MediaMarktSaturn Retail Group
MediaMarktSaturn Retail Group is die houermaatskappy vir die grootste Europese winkelketting vir elektroniese verbruikersware [1] waarin twee oorspronklik selfstandige winkelkettings en huidige handelsmerke, Media Markt en Saturn (vroeër Saturn-Hansa), saamgesmelt is. Vir die publiek tree Media Markt en Saturn nogtans as mededingers op waarby elkeen sy eie bestuur het en sy eie winkels (en aanlynwinkels) bedryf. 'n Derde handelsmerk, redcoon, tree uitsluitlik as aanlynhandelaar op. Die houermaatskappy maak tans nog deel uit van die aandelemaatskappy Metro AG, maar sal na dié se opsplitsing in 2017 deel uitmaak van die nuwe onderneming Ceconomy.[2] MediaMarktSaturn Retail Group se hoofkwartier is in die Beierse stad Ingolstadt geleë.
| MediaMarktSaturn Retail Group | |
   | |
| Tipe | Gesellschaft mit beschränkter Haftung (GmbH) |
|---|---|
| Gestig | 24 November 1979 |
| Hoofkantoor | Ingolstadt, Beiere, Duitsland |
| Sleutelpersone | Ferran Reverter Planet (hoof uitvoerende beampte), Florian Wieser (hoof finansiële beampte) |
| Gebied bedien | Europa, Turkye |
| Industrie | Kleinhandel |
| Produkte | Elektroniese verbruikersware, sagteware, boeke, kombuisgereedskap |
| Inkomste | 21,5 miljard € (2018/19) |
| Werknemers | 55 000 (17 Desember 2019) |
| Moedermaatskappy | Ceconomy AG |
| Divisies | Media Markt Saturn redcoon |
| Webwerf | Media-Saturn |
Die maatskappy word deur sy desentrale struktuur gekenmerk - sy winkels is in regtelike opsig selfstandige ondernemings waarin die MediaMarktSaturn Retail Group 'n meerderheid aandele hou. Die plaaslike bestuurders beskik oor 'n minderheid aandele van sowat tien persent. Hulle het 'n beperkte invloed op die aanbod, pryse, personeelbestuur en advertensies van hul handelswinkels.
Die MediaMarktSaturn Retail Group het in die afgelope dekades sterk groei getoon en tot die leidende handelsmaatskappy vir elektroniese verbruikersware in Europa ontwikkel. Tans is daar 1042 Media Markt- en Saturn-winkels in altesaam 14 lande wat in 2018/19 'n totale omset van 21,5 miljard € gegenereer het.[3] Die groep het tans sowat 55 000 medewerkers, waarvan 2 000 in die hoofkwartier in Ingolstadt.
Koronakrisis 2020
wysigAs gevolg van die Koronavirus-pandemie is 90 persent van die groep se Europese winkels in Maart 2020 voorlopig gesluit, terwyl klante steeds aanlynbestellings kan plaas en hierdie bestellings tuis mag ontvang of in 'n winkel kan afhaal. Volgens persberigte ly die maatskappy verliese van daagliks €55 miljoen en is sy likiditeit sodoende onder druk geplaas. Aangesien die groep se finansiering hoofsaaklik op korttermynlenings berus wat deur leweransiers toegestaan en ná 'n periode van drie tot vier maande, wanneer goedere verkoop is, terugbetaal moet word, het die groep in April 2020 in finansiële moeilikhede beland.[4] 'n Lening ter waarde van €2 miljard is deur die moedermaatskappy Ceconomy AG aangevra om korttermyn-likiditeit te verseker.[5]
Die onderneming onderhandel tans met sy sowat 800 leweransiers en verhuurders, terwyl die plasing van advertensies gestaak is. Die Duitse federale regering en deelstaatowerhede se besluit om die heropening van besighede tot winkels met 'n verkoopruimte van maksimaal 800 vk meter te beperk, is deur Media-Saturn gekritiseer - die groep se verkoopruimtes varieer tussen 1 000 en 18 000 vk meter en is dus groot genoeg om sosiale distansiëring te beoefen. Daar word oorweeg om 'n oplossing in lyn met die besluit te vind.
Verwysings
wysig- ↑ "Kontrolle, Kontrolle, Kontrolle, in: Süddeutsche Zeitung, 21 Februarie 2009". Geargiveer vanaf die oorspronklike op 22 Maart 2009. Besoek op 29 Maart 2009.
- ↑ "Willkommen bei CECONOMY. Besoek op 16 April 2017". Geargiveer vanaf die oorspronklike op 26 Maart 2017. Besoek op 16 April 2017.
- ↑ "mediamarktsaturn.com: Unternehmen. Besoek op 16 April 2020". Geargiveer vanaf die oorspronklike op 13 Junie 2020. Besoek op 16 April 2020.
- ↑ Business Insider, 8 April 2020: Fast alle Filialen in Europa geschlossen: Wie Media-Saturn wegen Corona um die Existenz kämpft. Besoek op 16 April 2020
- ↑ Finanzen.net, 30 Maart 2020: Corona-Krise: Ceconomy beantragt staatliche Finanzhilfen - Aktie mit Verlusten. Besoek op 16 April 2020