Mestre

Mestre [ˈmɛstre] is die sentrum en mees bevolkte stedelike gebied van vastelandse Venesië. Saam met die historiese middestad (Centro storico) en ander eilande in die Venesiaanse strandmeer maak dit deel uit van die Stad Venesië (Città di Venezia). Die Stad Venesië maak op sy beurt deel uit van 'n groter administratiewe eenheid op provinsiale vlak, die Metropolitane Stad Venesië.

Mestre
Località
Die kloktoring van Mestre is die laaste oorblyfsel van die Castello di Mestro
Mestre
Koördinate: 45°29′38″N 12°14′29″O
Land	Italië
Administratiewe streek	Veneto
Metropolitane Stad	Metropolitane Stad Venesië
Oppervlak
• Totaal	14,254 km2 (5,504 vk. myl)
Hoogte	3 m (10 ft)
Bevolking
• Totaal	88 228
• Digtheid	6 189,7/km2 (16 031/vk. myl)
Tydsone	UTC+1 (MET)
• Somertyd	UTC+2 (MEST)
Poskode	30171-30174
Skakelkodes	041
Webwerf	mestre.it

Mestre met die Ponte della Libertà, die gekombineerde motor- en spoorwegbrug na Venesië se historiese middestad. Die stad het 'n moderne en industriële karakter en huisves geriewe soos groot super- en hipermarkte wat in die Centro storico nie beskikbaar is nie

Die Stad Venesië vorm 'n munisipaliteit (Comune di Venezia) met ses frazioni of administratiewe stadsdele waarvan Mestre saam met die nabygeleë Carpenedo as Municipalità di Mestre-Carpenedo geadministreer word. As stadsbuurt vorm Mestre 'n plek of nedersetting (località in Italiaans). Mestre is in Augustus 1926 saam met drie ander munisipaliteite - Chirignago, Zelarino en Favaro Veneto - by Venesië ingesluit.

Mestre se geskiedenis strek terug tot in die Middeleeue. Die stad het vanaf die twintigerjare van die 20ste eeu vinnige groei beleef met die vestiging van uitgestrekte nywerheidsgebiede. Die meeste geboue het dus eers ná 1900 ontstaan. Die middestad, wat sowat een kilometer noord van die treinstasie geleë is, bied naas sy aantreklik voetgangerlaan nogtans 'n aantal besienswaardighede soos die sentrale plein Piazza Erminio Ferretto met winkels, boetieke, restaurante en straatkafees; die 13de eeuse kloktoring Torre dell'Orologio en enkele palazzi soos die Palazzo Podestarile wat tans kantore van die munisipaliteit huisves. Die katedraal of Duomo di Mestre het tussen 1781 en 1805 ontstaan.

Vervoer

Mestre word deur 'n gekombineerde motor-, spoorweg- en trembrug met die historiese middestad van Venesië verbind. Hierdie brug met 'n lengte van sowat 3 km is die enigste brug na die Strandmeerstad. Die treinstasie Venezia-Mestre is een van Venesië se groot vervoerspilpunte en word onder Italië se dertien besigste stasies gereken.Treine is die gewildste vervoermiddel vir uitstappies na bestemmings in Veneto soos Treviso - 'n eersteklasretoerkaartjie van Trenitalia op die roete Treviso - Mogliano Veneto - Mestre - Venezia Santa Lucia kos in Junie 2019 net iets meer as €10, tweedeklas retoer iets meer as €7.

Toerisme

Die Stad Venesië en sy ses administratiewe eenhede

Palazzo Podestarile, setel van die Munisipaliteit Mestre-Carpenedo

Weens die betreklik hoë hotelpryse in die historiese middestad van Venesië is hotelle in Mestre 'n alternatief vir besoekers met kleiner reisbegrotings. So het hier 'n groot verskeidenheid hotelle en ander verblyfplekke ontstaan. Daar is egter ook toeraanbieders wat toeriste op soek na verblyf in die Strandmeerstad om die bos probeer lei en liggings in Mestre net as "Venesië" vermeld. Hotelle in vastelandse Venesië is dikwels maklik herkenbaar aan hul pos- en straatadres - as dit 'n "Via" bevat, is die hotel nie in die historiese middestad van Venesië geleë nie. Daar is net enkele 19de eeuse strate in die Centro storico wat met Via... begin (soos Via Garibaldi in Castello) - hulle het hul oorsprong in opgevulde kanale.