Mineralewetenskappegebou UP

Die eenvoudige styl van dié gebou op die Hatfieldkampus van die Universiteit van Pretoria weerspieël eienskappe van die Klein Brasiliaanse of Moderne Brasiliaanse styl met sy liggroen en wit terrazzo-dekking en diamantvormige vensters langs die twee ingange. Hierdie gebou, wat op 3 Mei 1955 geopen is, het aanvanklik as die Derde Wiskundegebou bekend gestaan en is ontwerp deur die argitekte AL Meiring en PR Nel. Dit vorm die binneplein van die universiteit en 'n identiese gebou aan die suidekant van die Ingenieurstoring is terselfdetyd beplan, om te verseker dat toekomstige geboue se style nie bots nie. In die 1980s is verskeie departemente verskuif wat spontaan daartoe gelei het dat al die aardwetenskappe in een gebou saamgevoeg is, waarna die naam van hierdie gebou verander is na die Mineralewetenskappegebou.