Modderpoort

Modderpoort is ‘n nedersetting en spoorwegknooppunt in die ooste van die Vrystaat.

Ligging

Modderpoort lê 10km noord van Ladybrand in die rigting van Clocolan. Dit is in ‘n opening tussen die berg Viervoet en die sandsteenkoppie Platberg in die Verowerde gebied, slegs enkele kilometer wes van die Lesotho-grens en by die koördinate 29° 5′ 59.84″ suid en 27° 27′ 3.44″ oos en 1595m bo seevlak.

Sendingstasie

Die plek was aanvanklik bekend as “Lekhalong la Bo Tau”, die “nek van die leeufamilie”, wat verwys na die opening tussen Platberg en Viervoet. Modderpoort het ontstaan nadat die Anglikaanse kerk in 1869 met sendingwerk daar begin het. Lede van die sendinggenootskap het aanvanklik in ‘n grot in die Platberg gewoon en daar kerkdienste gehou totdat ‘n klooster en kapel uit sandsteen gebou is. In 1928 is ‘n skool en kweekskool vir onderwysers begin. Laasgenoemde sluit in 1955 weens apartheidswetgewing. Die bekendste alumni is waarskynlik die politikus Winkie Direko. In die kerkhof lê o.a. die Basoeto-profetes Mantsopa begrawe. Haar graf sowel as die grot waarin die sendingaktiwiteite begin het, is ‘n bedevaartsoord vir lede van die Zion Christian Church. Gelowiges aanvaar dat die water uit ‘n fontein by Moddepoort oor helende kragte beskik.

Spoorlyn

Op 15 Junie 1904 bereik die spoorlyn die dorp op die roete tussen Bloemfontein en Bethlehem. Van hier af swaai ‘n taklyn van 10km weg na Ladybrand. In 2002 is die spoortrajek tussen Ficksburg en Modderpoort gesluit.

Prehistoriese reste

Verskeie rotstekeninge is by die dorpie gevind. Een tekening toon inheemse Suid-Afrikaners gewapen met pyl en boog in ‘n geveg met mense wat tulbande en borsplate dra. Klipwerktuie van vroeëre bewoners is in die omgewing gevind. Daarom is die terrein by die sendingstasie in 1936 tot nasionale monument verklaar en in 1998 genomineer om as wêrelderfenisgebied verklaar te word.

Bibliografie

• Standard Encyclopaedia of Southern Africa, deel 7. Kaapstad: Nasou, 1972. ISBN 0-625-00323-3