Montgolfier-broers

Die twee broers, Joseph Michel Montgolfier (geb. 26 Augustus 1740 – † 26 Junie 1810) en Jacques-Étienne Montgolfier (geb. 6 Januarie 1745 – † 2 Augustus 1799) was die uitvinders van die warmlugballon. Die broers het die eerste bemande vaart met 'n jong wetenskaplike en 'n weermagoffisier as loodse moontlik gemaak. Hulle is later deur die Franse koning tot die adelstand verhef tesame met hulle pa, broers en susters.

Jacques Étienne Montgolfier

Vroeë jare

Die broers is gebore in 'n familie wat betrokke was by papiervervaardiging in Annonay in Ardèche, Frankryk as twee van sestien kinders. Joseph (12^de kind) het oor 'n tipiese uitvinderstemperament beskik - hy was onkonvensioneel en 'n dromer maar was nie baie vaardig ten opsigte van besigheids- en ander persoonlike sake nie. Sy broer Étienne (Die 15^de kind) was baie meer aangelê as dit by besigheidsaangeleenthede gekom het. Étienne is aanvanklik Parys toe gestuur om homself as argitek te bekwaam maar na die skielike dood van hul broer Raymond in 1772 is hy na Annonay teruggeroep om die familiebesigheid te bestuur. In die daaropvolgende 10 jaar, het Étienne sy talent vir tegniese innovasie in die familiebesigheid tot uiting laat kom. Hy het die nuutste Hollandse uitvindings ook by die familie se papiermeulens ingevoer. Sy werk het gelei tot erkenning van die regering van Frankryk asook 'n regeringstoelaag om die Montgolfier fabriek te ontwikkel tot 'n model vir ander Franse papiervervaardigers en het ook baie rykdom aan die familie besorg.