Maak hoofkeuseskerm oop

Die Quartier du Montparnasse [mɔ̃paʀˈnas] is 'n stadsbuurt in die 14de arrondissement (stadsdistrik) van die Franse hoofstad Parys, genoem na 'n kunsmatige Middeleeuse heuwel wat in die 1760's verwyder is om plek te maak vir die Boulevard du Montparnasse. Die heuwelpiek is op sy beurt genoem na die Griekse bergpiek Parnassos wat in die antieke mitologie as tuiste van die nege muses beskou is. Dit was 16de eeuse studente in die nabygeleë Quartier Latin wat hier in hul vrye tyd antieke gedigte geresiteer en die skertsende naam Mont Parnasse aan die heuwel verleen het.

Montparnasse
Uitsig oor Montparnasse, soos gesien vanuit die Eiffeltoring
Uitsig oor Montparnasse, soos gesien vanuit die Eiffeltoring
Arrondissements in Parys
Arrondissements in Parys
Ligging van Montparnasse op 'n kaart (Frankryk)
Montparnasse
Montparnasse
Montparnasse in Frankryk
Koördinate: 48°50′24″N 2°19′39″O / 48.84000°N 2.32750°O / 48.84000; 2.32750Koördinate: 48°50′24″N 2°19′39″O / 48.84000°N 2.32750°O / 48.84000; 2.32750
Land Vlag van Frankryk Frankryk
Administratiewe gewes Île-de-France
Stad Parys
Arrondissement 14de arrondissement
Oppervlak
 - Quartier (stadsbuurt) 1,126 km²  (0,435 vk m)
Bevolking (1999)
 - Quartier (stadsbuurt) 18 570
 - Stedelike bevolkingsdigtheid 16 492/km² (42 714,1/vk m)
Tydsone MET (UTC+1:00)
 - Somer (DST) MEST (UTC+2:00)
Poskode
Die begraafplaas Cimetière du Montparnasse, met die wolkekrabber Tour Montparnasse in die agtergrond
Die begraafplaas vorm 'n rustige groen oase in die digbeboude stadskwartier
Oorspronklik gevestig as 'n klein bistro op die hoek van twee boulevards, Raspail en Montparnasse, het La Rotonde die kuierplek van bekende persoonlikhede soos Pablo Picasso, Amedeo Modigliani, Jean Cocteau, Leon Trotsky, George Gershwin en F. Scott Fitzgerald geword[1]
Die Maine-Montparnasse-kompleks met die treinstasie Gare Montparnasse (die vertrekpunt vir treine na bestemmings in Wes- en Suidwes-Frankryk soos Bretagne en Bordeaux) en die tuin Jardin Atlantique, soos gesien vanuit die Tour Montparnasse, is voorbeelde van grootskaalse bouprojekte wat gedurende die 1960's as deel van destydse stadsbeplanning en -ontwikkeling in Montparnasse en die aangrensende Quartier Necker verwesenlik is

Gedurende die sogenaamde Années folles, die kulturele bloeitydperk tussen 1920 en 1929, was Montparnasse met sy kreatiewe atmosfeer en bekostigbare behuising die spilpunt van Parys se kuns- en intellektuele lewe. Skrywers, skilders, sangers en filosowe het - net soos 'n groot gemeenskap Amerikaners wat onder meer ontevrede was met die prohibisiewette in hul land[2] - in die kwartier se befaamde kroeë, bistro's en koffiehuise gekuier, soos La Coupole, Le Sélect, Le Dôme of La Rotonde. Bekende inwoners in dié tyd het Simone de Beauvoir (1908−1986) en die Amerikaanse skryweres Gertrude Stein (1874−1946) ingesluit.

Verskeie Paryse nagklubs was in dié periode, toe jazzmusiek hoogty gevier het, in besit van swart Amerikaners. Die getal Amerikaners in Parys het, ook danksy 'n voordelige wisselkoers, gestyg van 6 000 in 1921 tot 32 000 drie jaar later.[3]

Simone de Beauvoir, 'n boorling van Montparnasse, het haar laaste rusplek in die kwartier se groot begraafplaas en groen oase, die Cimetière du Montparnasse, gevind, net soos die filosoof en dramatikus Jean-Paul Sartre (1905−1980) en die sanger en komponis Serge Gainsbourg (1928−1991).

Alhoewel die meeste koffiehuise, kroeë en eetplekke uit die kulturele bloeitydperk bewaar gebly het, het Montparnasse sy status as gunstelingkwartier van kunstenaars en intellektueles, na wie in Parys as Montparnos verwys is, lankal kwytgeraak. Vanaf die 1960's het die kwartier tot een van die voorste Paryse sake- en vermaaklikheidsbuurte met talle rolprentteaters en skouburge aan die Seine se linkeroewer (Rive Gauche) ontwikkel.

FilmkunsWysig

Woody Allen se romantiese komedie Midnight in Paris, wat in 2011 ontstaan het, is 'n hommage aan Parys en Montparnasse in die tyd van die Années folles.

VerwysingsWysig

  1. La Rotonde Montparnasse - Le cœur de Montparnasse. Besoek op 3 Maart 2019
  2. History News Network, 10 Februarie 2019: The American Tourist in Paris: A Retrospective. Besoek op 3 Maart 2019
  3. Roy Kotinek and John Cohassey: American Cultural Rebels. Avant-Garde and Bohemian Artists, Writers and Musicians from the 1850s through the 1960s. Jefferson, North Carolina and London: McFarland & Company 2008, bl. 91

Eksterne skakelsWysig