Mud

Mud is ‘n ou inhoudsmaat vir droë ware.

Reeds in 1681 het die VOC standaarde neergelê vir inhoudsmate. Met die Britse oorname van die gesag het die Nederlandse stelsel van mate en gewigte bly bestaan, alhoewel die Britse stelsel in die dorpe stadig in gebruik gekom het. Soos die boere na die binneland getrek het, is die Nederlandse stelsel ook daar toegepas. Eers met die aanvaarding van die Wet op Mate en Gewigte in 1922 het Suid-Afrika werklike eenvormigheid ten opsigte van mate en gewigte gekry. Met Wet nr. 76 van 1973 het Suid-Afrika die metrieke stelsel van mate en gewigte aanvaar.

Die ou Nederlandse mate wat vir droë ware soos koring, meel en aartappels op die Suid-Afrikaanse platteland gebruik is, was die volgende:

1 mud
=3 boesel
=4 skepel
1 skepel= 2 emmers
1 boesel = 2 blikke

Die gewig van ‘n mud het gewissel tussen die 75 en 100 kilogram, afhangende van die produk, tyd in die geskiedenis en die plek waar daar geweeg is. ‘n Emmer is gebruik as inhoudsmaat vir meel en het ongeveer 11,3 kilogram geweeg.

Bibliografie wysig

Briel, Rudi: Albertinia. 100 jaar. 1902-2002. Albertinia: Lourette, 2002. ISBN 0-620-28944-9
Standard Encyclopaedia of Southern Africa, deel 11. Kaapstad: Nasou, 1975. ISBN 0-625-00327-6