Musaion en Amfiteater UP
Hierdie kompleks, op die Hatfieldkampus van die Universiteit van Pretoria, is gebou om fasiliteite vir die Departement Musiek, wat in 1958 gestig is, te verskaf. Die struktuur bestaan uit kantoorvleuels, 'n ouditorium en 'n opelug-amfiteater. UP-Alumnus en argitek Brian Sandrock was verantwoordelik vir die ontwerp van die fasiliteit wat gebou is op 'n gedeelte van die ou atletiekveld. Oorblyfsels van die toeskouerterasse rondom die baan kan nog steeds gesien word aan die oostekant van die Musaion. Die kantoorvleuel van die kompleks is in 1960 voltooi en die ouditorium en amfiteater in 1961. Die kompleks is amptelik geopen met 'n reeks konserte in 1961 en in April 1962 met 'n gala-konsert deur Suid-Afrikaanse operaster Mimi Coertse en die SAUK se Simfoniekonsert.
Die Musaion-ouditorium toon elemente van die Klein Brasiliaanse of Moderne Brasiliaanse styl en het 'n uitstekende akoestiek. In 1976 het die universiteit 'n meganiese-aksie pyporrel in die Musaion geïnstalleer wat bestaan uit 2659 orrelpype, waarvan die hoogste 4.9 meter is.
Die ouditorium het sitplek vir net meer as 500 mense en die amfiteater vir sowat 3000 mense. [1]
