Museumdorp Düppel

Museumdorp Düppel
'n Beeld van die museum.
'n Gerekonstrueerde 13de eeuse woonhuis

Plek Berlyn
Land Duitsland
Openingsjaar 1975
Tipe museum Opelugmuseum
Webtuiste www.dueppel.de

Die Museumdorp Düppel (Duits: Museumsdorf Düppel) is 'n opelugmuseum wat in 1975 naby die natuurbewaringsgebied Krummes Fenn in die destydse Berlynse distrik Zehlendorf (tans Steglitz-Zehlendorf) gestig is. Die museum, wat deel uitmaak van die Stiftung Stadtmuseum Berlin (Stigting Stadsmuseum Berlyn), is 'n poging om 'n hele dorp met sy natuurlike omgewing, soos dit in die middeleeue sowat 800 jaar gelede bestaan het, te rekonstrueer.

Geskiedenis wysig

 
'n Gerekonstrueerde graanstoorhuis (13de eeu)

Argeologiese vondse dui daarop dat die eerste bewoners hulle omstreeks 1170 in die gebied van die huidige stadsbuurt Düppel gevestig het - net veertien jaar nadat die Mark Brandenburg, 'n oorspronklik Slawiese streek, deur die Askaniër Albrecht die Beer verower is. Heel waarskynlik het daar in die nabyheid reeds 'n ouer Slawiese dorp bestaan. Die datering van argeologiese vondse laat navorsers vermoed dat die nedersetting in die eerste helfte van die 13de eeu deur 'n gemengde Slawies-Duitse bevolking bewoon is. Die twee etniese groepe het blykbaar vreedsaam naas mekaar geleef, onderling getrou en uiteindelik met mekaar versmelt.

Omstreeks 1230 was daar altesaam 16 plase in die dorp wat vir verdedigingsdoeleindes hoefystervormig rondom 'n groot dorpsplein, wat deur die gemeenskap as weiveld gebruik is, gebou is. Die dorp het later 'n Wüstung geword nadat die bevolking die nedersetting verlaat het. Die dorp is deur argeoloë opgegrawe, gerekonstrueer en tans gedurende die somermaande toeganklik vir besoekers.

Eksterne skakels wysig

Koördinate: 52°25′28″N 13°14′0″O / 52.42444°N 13.23333°O / 52.42444; 13.23333