NG gemeente Douglas

Die NG Gemeente Douglas is ’n gemeente in die Sinode van Noord-Kaapland.

Die gemeente se ou kerkgebou, ingewy op 12 November 1898.

Ds. H.J. Klem het die hoeksteen van die nuwe NG kerk op Douglas op 12 Mei 1951 gelê. Die argiteksfirma Geers & Geers & Vennote het dit ontwerp en die bouaannemer was Bradn & Brand.

Teen 1826 het veeboere uit die noordelike distrikte van die Kaapkolonie die Oranjerivier oorgesteek op soek na beter weiding vir hul vee. So het hulle mettertyd die gevestigde inwoners van die nuwe landstreek geword. Die owerheid en die kerk het destyds die verblyf van hierdie trekkers in Trans-Oranje as tydelik beskou, maar in 1850 is die Ring van Transgariep (Oranje) gevorm en het die kerklike bediening buite die kolonie ’n vaster vorm aan.

Die hoofdorp wat vir Albanie aan die Vaalrivier aangelê is, is toe Douglas genoem na sir Percy Douglas, luitenant-goewerneur van die kolonie. Die ontdekking van diamante in 1867 het die ontwikkeling aansienlik bespoedig. Die bevolking het vinnig toegeneem en jare van voorspoed het gevolg. Op 8 Mei 1897 het die Ringskommissie op Douglas byeengekom en is die nuwe gemeente van die gemeentes Dutoitspan, Hopetown en Griekwastad afgestig.

Hoewel die eerste kerkgebou op 12 November 1898 ingewy is, is die eerste leraar van Douglas, ds. B.F. Wessels, eers amper vyf jaar later op 27 September 1903 alhier bevestig. Dit was sy eerste gemeente nadat hy sedert Julie 1900 hulpprediker van Caledon was. Sy taak was moeilik: Vervoer was primitief en die gemeente het oor lang afstande gestrek, lidmate van die kerk is swaar verliese berokken deur runderpes, terwyl die oorlogsjare van 1899-1902 kerksake heeltemal ontwrig het. Hy het die gemeente in 1912 verlaat en is op 16 November daardie jaar bevestig in sy tweede en laaste gemeente, Oos-Londen, want daar is hy op 26 Desember 1929 oorlede.

Op 25 Mei 1913 is ds. C.J. Grobler, hulpprediker van Die Paarl, as leraar van die gemeente bevestig. Sy ampsbediening is gekenmerk deur die Eerste Wêreldoorlog en die “Swart Oktober” van 1918, toe die griepepidemie ook hier sy slagoffers geëis het. Ds. Grobler se ander drie gemeentes was ook in die later provinsie Noord-Kaap, wat op 20 Oktober 1920 is hy in Niekerkshoop bevestig, op 18 April 1925 in Britstown en eindelik op 13 Julie 1929 in Griekwastad, waar hy sy emeritaat op 4 Desember 1937 aanvaar het.

Die kerk van Douglas, skryf die gemeente se medewerker in Ons gemeentelike feesalbum (1952), “het altyd ’n lewendige belangstelling getoon in die saak van onderwys”. Met die stigting van ’n sendinggemeente is nog ’n mylpaal in die gemeente se geskiedenis bereik toe eerw. J.P.O. Pienaar op 25 Maart 1950 as eerste sendeling bevestig is.

Die hoeksteen van die nuwe kerk is op 12 Mei 1951 gelê.

Bronne

• (nl) Maeder, ds. G.A. en Zinn, Christian. 1917. Ons Kerk Album. Kaapstad: Ons Kerk Album Maatschappij Bpkt.
• (af) Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.

Predikante

• Barend Johannes Wessels, 26 Sep. 1903 – 1912
• Cornelius Johannes Grobler, 31 Mei 1913 – 1920
• Albert Jacobus Stals, 20 Aug. 1921 – 1925
• Theunis Christoffel Botha Stofberg, 5 Feb. 1927 – 1930
• Gabriël Petrus le Roux, 11 Okt. 1930 – 1936
• Nicolaas Everhardus Nel, 5 Sep. 1936 – 1940
• Gustavus Adolphus Weich, 19 Jul. 1941 – 1947
• Hermanus Johannes Klem, 19 Jun. 1948 – 1954
• Pieter Bernardus Botha, 12 Feb. 1955 – 1958
• Erick Severis Breytenbach, 25 Okt. 1958 – ?
• Daniel Gerber, ? – 30 November 2020 (aanvaar sy emeritaat)
• Kobus Vermeulen, 4 April 2021 – hede