NG gemeente Ebenhaeser

Die NG gemeente Ebenhaeser (ook soms gespel "Ebenhaéser") was ’n gemeente van die Nederduitse Gereformeerde Kerk in Pretoria wat in 1985 nog 125 doop- en 388 belydende lidmate gehad het met ds. H.J. Bouwer as leraar. Die kerkgebou was by Frederickstraat 506, Pretoria-Wes. Later het die lidmate egter so afgeneem dat die gemeente ingelyf is by Wespoort, wat net twee jaar voor Ebenhaeser in dieselfde omgewing gestig is.

Ds. J.D. Gertenbach, Ebenhaeser se eerste leraar. Hy het oorgekom van die moedergemeente, Pteoria-Wes en in 1963 sy emeritaat hier aanvaar, maar daarna in 1964 hospitaalbearbeider geword.

Stigting

Ebenhaeser is op 26 Januarie 1951 afgestig van Pretoria-Wes, wat trouens ook by Wespoort ingelyf is, nes Kwaggasrand en Pretoria-Polisiekollege. Dit was die 30ste gemeente wat in Pretoria gestig is. Die eerste leraar, ds. J.D. Gertenbach, is op 21 Februarie beroep en op 7 April 1951 bevestig. Twee jaar later skryf die gemeente se medewerker in Ons gemeentelike feesalbum: “Met die ontvangs van die eerste pastoriepaar was die geesdrif eenvoudig wonderlik en verrassend, ja, buitengewoon oorweldigend. Die gemeentelike geselligheid op die aand van 6 April was met een woord 'n puik organisasie en die indrukke onuitwisbaar.” Dit alles het geskied onder die bekwame leiding van ds. en mev. P.J.N. Smal. Saterdagaand het die bevestiging plaasgevind. Die feesredenaar by die geleentheid was ds. J.P.H. Gertenbach van Volksrust, 'n broer van die bevestigde. Hy het 'n passende rede gehou oor Josua 1:5b: “Ek sal jou nie begewe en jou nie verlaat nie."

Die eerste voltallige kerkraad was die volgende: Ouderlinge: M.J. Fourie, M.J. Fouche, M J. Lourens, G. van Zyl, G. Nel, P.J. Malan, D.J. Retief, H.L. Scott, J.J. Lewis, H.J.B. Potgieter, H.B. Lewis, A.P. Slabbert, M.J. Middleton, J.H.S. Geldenhuys, M.J.L. Prinsloo. Diakens: J.G. Richter, W.J. Odendaal, H.J. Crause, W.L. du Plessis, J.N.R. van Rhyn, A.J. Groenewald, A.J.L. Gertenbach, R. du Preez, A.P. Coetzee, M.J. van. der Nest, J.A. Kruger, H.C.W. Muller, J.A. van der Merwe, H.A. van der Merwe en P. Prinsloo.

Geldinsameling

Die jong gemeente was lewenslustig, ondernemend, hardwerkend en geesdriftig. Een ná die ander basaartjie of verkoping is gehou en die samewerking was prysenswaardig en het aansteeklik gewerk. Die boufonds staan aan die einde van Junie 1951 op £400, en kort voor lank kon 'n sierlike kerkgebou in die gemeente verrys. 'n Orrel was toe reeds aangekoop en die geld daarvoor is maklik gevind. Volgens Ons gemeentelike feesalbum het die geld “so maklik . . . ingestroom, dat ons nie daaraan kan twyfel dat wanneer ons eers bou, die stroompies uit baie fonteine na daardie een groot doel voor oë sal vloei en altyd sterker sal word, totdat alles betaal is nie. Die fonteine sal ontstaan deur die werkinge van die Heilige Gees in dié harte wat hulleself aan die Here en sy saak oorgee. Al die geesdrif en liefde werk reeds profeties in hierdie rigting. Ons vergader tot aanbidding en lof en tot stigting in die grootste skoollokaal van die Simon Bekker-skool, wat goedgunstig deur die skoolraad en skoolhoof aan ons toegestaan is.”

Die eerste orrelis was A.J.L. Gertenbach, die scriba/kassier A.W. L. Smal en koster P.J. Malan.

Enkele leraars

• Jan Diedeliff Gertenbach, 1951 - 1963
• Nicolaas Jacobus Rautenbach, 1966 - 1972

Bronne

• (nl) Maeder, ds. G.A. en Zinn, Christian. 1917. Ons Kerk Album. Kaapstad: Ons Kerk Album Maatschappij Bpkt.
• (af) Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.

Eksterne skakels

• (en) Die kerkkompleks van die destydse gemeente Ebenhaeser by Frederickstraat 506, Pretoria-Wes, soos te sien op Google Maps. URL besoek op 31 Julie 2015.