NG gemeente Pretoria-Wes

Die NG gemeente Pretoria-Wes was ’n gemeente van die Nederduitse Gereformeerde Kerk in Pretoria, maar dis later ingelyf by die NG gemeente Wespoort.

Ds. J.S. Theron het van die moedergemeente Pretoria oorgekom en in 1925 die gemeente se eerste leraar geword. Hier het hy gearbei tot 1929.

Die NG kerk Pretoria-Wes, soos dit gelyk het in 1951.

Ds. John Adler, leraar van 1929 tot 1948. Sy vrou het onder die pennaam Annemarie Wessels geskryf.

Ds. Harper Martins, leraar van 1947 tot 1952.

Ds. J.D. Gertenbach, leraar van 1949 tot 1951, toe hy 'n beroep aanvaar na die pas gestigte dogtergemeente Ebenhaeser.

Ds. P.J. Conradie, leraar van 1952 tot 1967.

Ds. S.P. du Plessis, leraar van 1969 tot 1972. Hy het tussen 1951 en 1986 nege gemeentes bedien waarvan vyf teen 2015 nie meer bestaan het nie.

Beginjare

Ná die stigting van die gemeente in 1925 is ds. J.S. Theron beroep en het die eerste leraar van die gemeente geword. Die gemeente het gou tot so 'n mate gegroei dat op 13 September 1928 besluit is om oor te gaan tot die beroeping van 'n tweede leraar. Op 18 Januarie 1929 is die dienste van die destydse prop. J. Adler as hulpprediker van die gemeente aangeneem. Later is prop. J. Adler eenparig as tweede leraar beroep en is hy op 19 April 1929 georden op Voortrekkerhoogte, wat destyds onder hierdie gemeente geressorteer het.

Op 30 Junie 1929 het ds. Theron na Prins Albert vertrek en die gemeente is deur ds. Adler tot 1935 alleen bearbei. Ná die vertrek van prop. Loots, wat vanaf 1935 in die gemeente gehelp het, het die volgende tot omstreeks 1951 as hulp- en medeleraars in die gemeente gearbei: di. A.M.H. Koornhof, J.J. Fick, W.C.O. du Toit, P. Kock en D.J.H. van den Berg.

Afstigtings

Al is daar voorsiening gemaak vir 'n groot kerkgebou, het die uitbreiding tot so 'n mate voortgegaan dat die dogtergemeente Voortrekkerhoogte op 27 Junie 1940 afgestig is. Slegs 'n paar jaar ná Voortrekkerhoogte is 'n tweede dogtergemeente, Quaggapoort afgestig. Ná die vertrek van ds. D.J.H. van den Berg na Venterspos (later genoem Westonaria), is ds. H. Martins as medeleraar van die gemeente beroep en gedurende Mei 1947 bevestig.

Op 26 September 1949 het ds. J. Adler vertrek na Berea, Durban, nadat hy 19 jaar lank die gemeente met vrug bearbei het, en in sy plek is ds. J.D. Gertenbach beroep en bevestig. Op 26 Januarie 1951 is 'n derde dogtergemeente, naamlik Ebenhaeser afgestig en ds. Gertenbach het 'n beroep na die nuutgestigte dogtergemeente aanvaar.

In 1952 skryf die gemeente se medewerker in Ons gemeentelike feesalbum: “Deur die jare heen het ons Hemelse Vader ons gemeente wonderlik gelei en bewaar. Aan Hom kom al die eer toe vir wat in sy Naam gedoen kon word.”

Verkoop van die kerkgebou

Die kerkgebou is in 1997 aan Moslems verkoop vir R1,65 miljoen en later omskep in 'n moskee, genaamd Masjid Uthman. Ds. Etienne Maritz, Pretoria-Wes se laaste predikant, het hom as volg uitgelaat oor die verkoop van die kerkgebou: "Ons buurt het 'n handelsentrum geword. Ons mense was aan die wegtrek uit die gebied en ander etniese groepe het ingetrek. Die demografie van die gebied het so baie verander dat ons nie genoeg mense of genoeg hulpbronne gehad het om die kerk aan die gang te hou nie. Ons het die ryk kerke in die ooste van Pretoria om geldelike hulp gevra, maar hulle wou ons nie help nie. Weens die dalende lidmaattal en ons geldelike onvermoë om aan te gaan, het ons besluit om te ontbind en die kerk te verkoop. Al aanbod wat ons gekry het, was van 'n Indiese sakeman wat ons die indruk gegee het die eiendom sou vir sakedoeleindes gebruik word as hy dit sou koop. Ons het dit toe aan dié Indiese sakeman verkoop in 1997. Hy het dit toe aan ander mense verkoop wat dit in 'n moskee omskep het."

Enkele leraars

• Johannes Stefanus Theron, 1925 – 1929
• John Adler, 1929 - 1948
• Jan Diedeliff Gertenbach, 1949 - 1951 (waarna eerste leraar van dogtergemeente Ebenhaeser)
• Harper Martins, 1947 - 1952
• Pieter Jacobus Conradie, 1952 - 1967
• Sarel Petrus du Plessis, 1969 – 1972

Bronne

• (nl) Maeder, ds. G.A. en Zinn, Christian. 1917. Ons Kerk Album. Kaapstad: Ons Kerk Album Maatschappij Bpkt.
• (af) Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.

Sien ook

• NG gemeente Quaggapoort, afgestig in 1946
• Gereformeerde kerk Pretoria-Wes

Eksterne skakels

• Die destydse NG kerk Pretoria-Wes word nou geheel en al omring deur die Masjid Uthman Islamitiese Sentrum. URL besoek op 31 Julie 2015.