NG gemeente Estoire
Die NG gemeente Estoire is ’n gemeente van die Nederduitse Gereformeerde Kerk in die Vrystaat hoofstad, Bloemfontein. Dit is tans (2015) die 80ste oudste gemeente in die Vrystaatse Sinode.
Die naoorlogsjare in Bloemfontein is gekenmerk deur 'n fenomenale groei van die stad. Een ná die ander nuwe gemeente word afgestig, en op 17 Oktober 1947 is hierdie gemeente deur die Ringskommissie van die Ring van Bloemfontein gestig. Die moedergemeente, De Bloem, was toe pas 12 jaar oud.
Op 3 November 1947 is ds. François Albertus Dreyer, destyds medeleraar van die gemeente De Bloem, as eerste leraar van die nuutgestigte gemeente Estoire beroep. Hy aanvaar die beroep en word op 24 Januarie 1948 bevestig.
Dit het spoedig geblyk dat die kerksaal vir die groeiende gemeente te klein geword het, en in Mei 1948 is die saal teen 'n koste van £2 550 vergroot. Vroeg in 1950 is met die bou van 'n sierlike pastorie begin, dog voordat dit nog in gebruik geneem kon word, moes die gemeente afskeid neem van hul geliefde leraar wat 'n beroep na Dewetsdorp aanvaar het.
Op 15 April 1950 is ds. Gerhardus Willem Koornhof van Durban beroep. Hy aanvaar die beroep en word op 26 Augustus bevestig. Nog steeds groei hierdie gemeente. Waar dit met afstigting in 14 wyke verdeel was, was daar teen 1951 21 wyke. Die bou van 'n kerk is deur 'n groot deel van die gemeente sterk gepropageer, en, so berig Ons gemeentelike feesalbum in 1951, "ons voel oortuig die intuïsie en leiding van ds. Koornhof sal die gemeente spoedig tot die daad bring".
Enkele leraars wysig
- Francois Albertus Dreyer, 1947 – 1950
- Gerhardus Willem Koornhof, 1950 – 1958 (aanvaar sy emeritaat)
Bronne wysig
- (af) Olivier, ds. P.L., 1952. Ons gemeentelike feesalbum. Kaapstad en Pretoria: N.G. Kerk-uitgewers.
Eksterne skakels wysig
- (en) Die kerkgebou soos te sien op Google Maps. URL besoek op 28 Augustus 2015.