NG gemeente Reivilo

Die NG gemeente Reivilo is ’n NG gemeente in die ring waaraan hy sy naam verleen en in die Sinode van Noord-Kaapland. Die middelpunt is op die dorp Reivilo, padlangs sowat 100 km suidoos van Kuruman en sowat 110 km suidwes van Vryburg.

Geskiedenis

Die stigting van die gemeente het plaasgevind op Saterdag 2 Junie 1883 op die plaas Klein-Boetsap, ongeveer 130 km noordwes van Kimberley. As konsulent is aangestel ds. J.D. Kestell, wat ’n jaar tevore as leraar van Kimberley georden is. Die eerste kerkraadsvergadering is op 21 Julie 1883 onder voorsitterskap van Vader Kestell gehou en die eerste notule verskyn ook in die netjiese handskrif van die voorsitter. Die eredienste is waargeneem in die skoolgebou wat die kerkraad later vir ’n kerk gekoop het. Die gebou is in die middel van die 20ste eeu deeglik herstel in die tyd toe dit nog as aanbiddingsplek gedien het, maar op 17 April 1969 het die kerkraad besluit geen dienste sou langer daar gehou word nie weens die ontvolking van die dorpie.

In die beginjare het die gemeente die naam Cathcart-West gedra, maar in 1890 is die naam op aandrang van die kerkraad na Klein-Boetsap verander. In 1887 het prop. J.J. Ackermann die beroep hierheen aanvaar. In 1914 het ds. A.J. Olivier die beroep na Klein-Boetsap aangeneem. Destyds het dit duidelik begin blyk dat Klein-Boetsap nie langer ’n geskikte middelpunt van die gemeente gevorm het nie. Rondom het groot “reservate” vir swart mense gelê waarin geen wit mense mog woon nie. Die kerkraad het toe ’n geskikte plek gesoek.

Einde 1917 het hulle die plaas Bruintjiesfontein op die Ghaapse plato, amper 70 km noordwes van Boetsap, van A.J. du Plessis teen ’n pond per morg aangekoop. Die woonhuis het as pastorie gedien. Langsamerhand het Bruintjiesfontein in belangrikheid toegeneem. Die predikant het hier kom woon. ’n Dorpie is aangelê en is ter ere van ds. Olivier Reivilo genoem, sy van agterstevoor geskryf. Tog het die gemeente se naam nog tot 1927 Klein-Boetsap gebly.

Ná ds. Olivier se vertrek het ds. A.F. Marais van Namies (later Pofadder genoem) die beroep in 1926 aanvaar. Ná sy vertrek in 1919 het ds. C.W.I. Pistorius die herderstaf opgeneem. Gedurende sy verblyf is in 1933 die vyftigjarige bestaan van die gemeente luisterryk gevier.

Ná sy vertrek in 1939 is ds. J.N.W. de Jager bevestig en in 1944 het ds. D. de Jager van die arbeidsnedersetting Goedemoed (waar indertyd nog ’n afsonderlike gemeente was) sy vangenoot opgevolg. Op 6 Maart 1949 is R.P.B. Erasmus in die gemeente bevestig. Die eerste kerk op Reivilo is in 1923 in gebruik geneem.

Vanaf kort voor die uitbreek van die Tweede Wêreldoorlog het die dorp en daarmee saam die gemeente vinnig uitgebrei, hoofsaaklik te danke aan die Koöperatiewe Kaasfabriek wat in 1937 op Reivilo opgerig is. In 1946 is die gemeente Goedvertrou van Reivilo afgestig. In 1952 kon die gemeente se medewerker aan Ons gemeentelike feesalbum berig: “Op verskillende terreine het die Kerk sy stempel gedruk en met groot dankbaarheid kan ons getuig van die seën van die Here wat op die werk van die Kerk gerus het. Ons gemeente beskik oor ’n hele aantal goeie geboue en is dankbaar vir die bestaan van ’n hoërskool met 360 kinders.”

In Februarie 1972 het die kerkraad besluit om ’n nuwe kerk te bou omdat die bestaande kerkgebou onttoereikend geword het. In Julie 1973 het ’n argitek planne vir ’n nuwe gebou voorgelê en in 1974 is besluit om die gemeente se bestaande orrel te herbou en te versterk sodat dit in die nuwe kerk ingebou kon word. Dié kerkgebou is op Saterdag 22 en Sondag 23 November 1975 in gebruik geneem.

Predikante

Andries Johannes Olivier, 22 Aug. 1914 – 1921; 5 Aug. 1922 – 1926
Andries Francois Marais, 6 Nov. 1926 – 1929
Carl Wilhelm Irené Pistorius, 9 Jul. 1930 – 1939
Johan Nicolaas Wilhelm de Jager, 11 Nov. 1939 – 1943
Daniël de Jager, 13 Mei 1944 – 1948
Rudolph Philip Botha Erasmus, 5 Mrt. 1949 – 1966
J.A. du Plessis, 4 Sep. 1966 – ?
A.J.C. van Staden, 22 Jan. 1977 – ?
Petrus Gerhardus Smit, 13 Sep. 1981 – ?