NG gemeente Wesselsbron
Die NG gemeente Wesselsbron is ’n byna eeu oue gemeente op die gelyknamige Vrystaatse dorp en in die Ring van Bultfontein. Die dogtergemeente Wesselsbron-Noord het in 1962 van die moedergemeente afgestig.
Die gemeente is op 8 Junie 1927 afgestig van die omliggende gemeentes Hoopstad, Bultfontein en Odendaalsrus. ’n Deel van die plaas Soetvlei, groot 1500 morg, is deur ’n bestaande plaaslike kommissie aangewys vir die uitleg van ’n dorp. In 1926 is hier ’n saal gebou en sonder skuld ingewy. Die getal lidmate van die gemeente was met die afstigting om en by die 400.
Ná heelwat beroepe uitgebring is, is ds. B.A. Muller van Alberton op 16 Maart 1928 as die eerste leraar verwelkom. Hy en mev. Muller, met hul twee kinders Betsie en David, is met ’n perdekommando die dorp geleide ingedoen. Die onthaal het by die skool met drie klaskamers en onder bokseile plaasgevind. Die prinsipaal was destyds mnr. S. P. Malan. Die bevestigingsrede is uitgespreek deur ds. D.P. Cillié van Ventersburg. Die Sondagmôre het ds. Muller sy intreerede na aanleiding van Fil. 4:13 in ’n vol saal en voor ’n aandagtige gehoor gelewer.
Op 8 Desember 1928 besluit die kerkraad dat ’n begin met die insameling van ’n kerkboufonds gemaak word. Ná raadpleging en organisasie vooraf word op 1 Februarie 1929 eenparig op ’n gemeentevergadering besluit dat ds. Muller saam met elke diaken in die gemeente vir die boufonds sal kollekteer. Op dieselfde vergadering het oudl. Hennie van der Merwe die bal aan die rol gesit deur £500 te gee as daar 20 ander is wat elk £100 gee; 12 honderdponders het opgestaan en etlike vyftigponders.
Die jare 1930 tot 1934 was moeilik en moes die insameling gestaak word. In 1935 is weer begin en op 9 April 1938 is die hoeksteen, in teenwoordigheid van ’n groot skare en besoekende predikante deur ds. B.A. Muller gelê toe ’n rekordbedrag van £1100 op die hoeksteen geplaas is. Die groot dag, 28 Januarie 1939, het aangebreek toe ’n sierlike Godsgebou sonder skuld ingewy kon word. Die inwydingspreek is deur wyle ds. A.J. Olivier van Brandfort gelewer. Oudl. J. G. Kotzê het £1000 geskenk vir die orrel, wat met die inwyding reeds gebruik kon word. So was daar ook andere skenkers.
In die jare veertig is die kerksaal, ’n sieraad vir die dorp, vernuwe en vergroot. Ook vir die opvoeding is deur die kerkraad gesorg. In 1930 is die Brandwag-Koshuis ingewy, wat gedurig vergroot is en nou ’n 80 kinders kan huisves.
Bron
wysig- Olivier, ds. P.L., 1952. Ons gemeentelike feesalbum. Kaapstad en Pretoria: N.G. Kerk-uitgewers.