Nathan Berger
Nathan Berger (Litaue, 15 Julie 1910 – onbekend) was die eienaar van ’n Suid-Afrikaanse drukkery, Pacific Press (Edms.) Bpk.
Berger was die seun van H. Berger. Hy het sy opvoeding in sy geboorteland ontvang en daarna aangesluit by ’n drukkeryonderneming in Litaue, waar hy werksaam was tot September 1930. Hy was een van die gelukkige Jode wat betyds uit Litaue kon padgee, want toe Duitsland die Sowjetunie (waarvan Litaue toe nog deel was) op 22 Junie 1941 binneval, was daar steeds 250 000 Jode in die dorpe en gehuggies (shtetls) van die land. Feitlik dadelik het die Einsatzgruppen (mobiele moordeenhede) en hul plaaslike kollaborateurs die volksmoord op die Jode begin. Teen November daardie jaar het net sowat 40 000 Jode oorgebly, saamgehok in die ghetto's van Vilnius, Kowno, Shawli en etlike slawearbeidkampe. Teen 1944 het die Nazi's 90% van Litaue se Jode uitgemoor.
Nadat hy in Suid-Afrika verskeie beroepe beoefen het, het hy in Mei 1947 Pacific Press (Edms.) Bpk. saam met Joseph Borwein begin. Hulle het hulle toegespits op die druk van Hebreeuse en Jiddisje publikasies.
Berger is in Januarie 1937 met Noami, die dogter van S. Barwin, getroud. Twee seuns en ’n dogter is uit die huwelik gebore. Sy stokperdjie was rolbal en hy was lid van die Joodse Gilde-rolbalklub. Hy en sy gesin het in die vroeë 1960's by Sandersstraat 54, Yeoville, gewoon.
Bronne
wysig- (af) (en) Kruger, dr. D.F. 1963. Wie is wie in Suid-Afrika. Johannesburg: Vitae Uitgewers.