Neutronsluiter

'n Neutronsluiter is 'n toestel wat by 'n deeltjieversneller gebruik word om 'n bundelpyp tydelik te blokkeer sodat neutrone nie daarmee langs kan ontsnap nie.

Tydens die werking van 'n deeltjieversneller slaan die hoëenergiedeeltjiebundel soms teen 'n stilstaande voorwerp vas. Dit kan doelbewus gebeur, byvoorbeeld tydens 'n verstrooiingseksperiment of die opstelling van die masjien, of dit kan onbedoeld wees, soos wanneer 'n onderdeel wanfunksioneer en die bundel per ongeluk teen die kant van die bundelpyp vasslaan. In albei gevalle word 'n groot aantal neutrone tydens hierdie botsings vrygestel (hulle word uit die stilstaande atome se kerne losgeslaan). Sulke neutrone is 'n vorm van ioniserende straling, en kan skade aan biologiese weefsel, soos dié van mense, aanrig. Dit is dus belangrik om alle bundelpype wat na gebiede lei waar mense moontlik aanwesig kan wees, tydelik met neutronsluiters te blokkeer. Indien daardie gebiede in 'n latere stadium (nadat mense ontruim is) weer vir eksperimente gebruik word, kan die neutronsluiters teruggetrek word om die bundelpyp oop te maak.

Neutronsluiters bestaan gewoonlik uit 'n groot blok lood of staal, wat meganies rondgeskuif kan word sodat dit die bundelpyp óf heeltemal blokkeer óf heeltemal ooplaat. Hierdie meganisme word dan in 'n lugdigte omhulsel geplaas sodat geen lug in die bundelpyp kan inkom tydens die oop- en toemaak nie, aangesien dit belangrik is om die vakuum in die bundelpyp te bewaar.