Oliver Goldsmith

Oliver Goldsmith (10 November, 1728 - 4 April, 1774) was 'n Ierse essayis, digter, roman- en toneelskrywer wie se gedig The deserted village deur baie as een van die beste gedigte van die 18e eeu beskou word. Oliver Goldsmith is in Kilkenny West, Westmeath, gebore en het aan die Trinity College in Dublin gestudeer, waarna hy in Europa rondgeswerf en sy geld verdien het deur fluit te speel.

In 1756 het hy sonder 'n sent in Londen aangekom en ná drie jaar van groot armoede sy eerste literêre deurbraak gemaak met 'n reeks essays, The citizens of the world, wat in 'n Londense koerant gepubliseer is. In dié tyd het hy ook bevriend geraak met Samuel Johnson, James Boswell en die skilder Joshua Reynolds.

In 1764 het die lang gedig The traveller verskyn waarin hy indrukke van sy reis deur Europa beskryf het. Twee jaar later het The vicar of Wakefield, een van die eerste gesinsromans in die Engelse letterkunde, verskyn. Dié roman, asook die gedig The deserted Village (1770) en die komedie She stoops to conquer (1773), is sy bekendste werke. Laasgenoemde word steeds opgevoer, ook in Suid-Afrika. Goldsmith was 'n onpraktiese, vrygewige en onverantwoordelike maar besonder sjarmante en veelsydige man met baie vriende. Hy is op 4 April 1774 in Londen oorlede, waarna sy vriende 'n monument vir hom in die sogenaamde Poets' Corner in die Westminster-abdy opgerig het.

Bronnelys

• Wêreldspektrum, Volume 9, bl.44, ISBN 0908409451