El Hadj Omar Bongo Ondimba (gebore Albert-Bernard Bongo; 30 Desember 1935 - 8 Junie 2009) was 'n Gaboense politikus wat 42 jaar lank president van Gaboen was, vanaf 1967 tot sy dood in 2009.

Omar Bongo is in die 1960's bevorder tot sleutelposisies as jong amptenaar onder die eerste president van Gaboen, Léon M'ba, voordat hy tot vise-president verkies is in 1966. In 1967 volg hy M'ba op na die dood van laasgenoemde om die tweede president van Gaboen te word.

Bongo was die leier van die eenparty-regime van die Gaboense Demokratiese Party (PDG) tot 1990, toe hy, met openbare druk, gedwing is om veelpartypolitiek in Gaboen in te voer. Sy politieke voortbestaan ondanks hewige teenkanting teen sy heerskappy in die vroeë negentigerjare blyk weer te spruit uit die konsolidasie van mag deur die meeste van die belangrikste opposisieleiers destyds na sy kant te bring.

Die presidensiële verkiesing in 1993 was uiters kontroversieel, maar eindig met sy herverkiesing en die daaropvolgende verkiesings van 1998 en 2005. Sy onderskeie parlementêre meerderhede het toegeneem en die opposisie het met elke daaropvolgende verkiesing verswak. Nadat die Kubaanse president Fidel Castro in Februarie 2008 uitgetree het, het Bongo die wêreld se langsdienende nie-koninklike leier geword.

Daar word gekritiseer dat Bongo eintlik vir homself, sy familie en plaaslike elite gewerk het, en nie vir Gaboen en sy mense nie. Die Franse groen politikus Eva Joly het byvoorbeeld beweer dat Gaboen gedurende Bongo se lang bewind, ondanks die olie-geleide BBP per capita-groei tot een van die hoogste vlakke in Afrika, slegs 5 km se snelweë per jaar gebou het en steeds een van die wêreld se hoogste kindersterftesyfers gehad het teen sy dood in 2009.

Na Bongo se dood in Junie 2009, is sy seun Ali Bongo - wat lank deur sy vader die belangrikste ministeriële verantwoordelikhede opgedra is - verkies om hom in Augustus 2009 op te volg.

Eksterne skakels wysig