Omwentelinge per minuut
(Aangestuur vanaf Opm)
| Omwentelinge per sekonde |
OPM |
|---|---|
| ¼ | 15 |
| ½ | 30 |
| 1 | 60 |
| 2 | 120 |
| 5 | 300 |
| 10 | 600 |
| 25 | 1500 |
Omwentelinge per minuut (afgekort opm of min-1) en dikwels na verwys as toere is 'n eenheid van frekwensie wat gewoonlik gebruik word om omwentelingsnelheid te meet, veral in die geval van omwentelinge rondom 'n vaste as. Dit verteenwoordig die aantal volle draaie wat 'n voorwerp in 'n minuut maak.
Voorbeelde
wysig- Grammofoonplate het tipies teen 16, 33 ⅓, 45 of 78 opm gedraai.
- Klank-CDs draai teen snelhede van ongeveer 500 opm wanneer die binneste databaan gelees word tot 180 opm wanneer die bane aan die buitenste rand gelees word.
- 'n Rekenaar se hardeskyf se toere wissel tussen 3600, 5400 of 7200 opm in IDE-tipes en tussen 10 000 en 15 000 in sommige SATA- en SCSI-skywe.
- 'n 52xCD-ROM skyfleser kan 'n kompakskyf teen 10 350 toere per minuut laat draai.
- Die sekondewyser van 'n analooghorlosie draai teen 1 opm.
- 'n Wasmasjien se balie draai teen 600 tot 1600 opm tydens 'n spinsiklus.
- 'n Motorvoertuig se enjin se omwentelinge wissel tussen 700 en 8000 opm.
- 'n Binnebrandenjin in 'n vliegtuig draai tussen 2000 en 3000 opm.
- 'n Renmotor se enjin kan teen veel hoër toere draai, so hoog as 19 000 opm in Formule Een.
- Gasturbines roteer teen tienduisende opm.
- 'n Zippe-tipe sentrifuge vir die verryking van uraan draai teen 90 000 opm of vinniger.