Usāma ibn Muhammad ibn Awad ibn Lādin, bekend as Osama bin Laden (Arabies: أسامة بن محمد بن عوض بن لادن الحضرمي الكندي, ʾUsāmah bin Muḥammad bin ʿAwaḍ bin Lādin al-Ḥaḍramī al-Kindī; 10 Maart 1957, Riaad, Saoedi-Arabië2 Mei 2011, Abbottabad, Pakistan) was 'n terroris en die geestelike leier van verskillende djihadistiese groepe soos byvoorbeeld al-Kaïda. As moedjahid het Bin Laden met Amerikaanse steun teen die Sowjet-inval in Afghanistan geveg.[5] Sedert 1994 was hy staatloos en is in 1999 op die Federal Bureau of Investigation (FBI) se lys van 10 mees gesoekte voortvlugtiges (Ten Most Wanted Fugitives) geplaas.

Osama bin Laden
أسامة بن محمد بن عوض بن لادن
Osama bin Laden
Osama bin Laden, ca. 1997

1ste Algemene Emir van Al-Kaïda
Ampstermyn
1988 – 2 Mei 2011
Voorafgegaan deur Nuwe amp
Opgevolg deur Ayman al-Zawahiri

Persoonlike besonderhede
Gebore Usama bin Mohammed bin Awad bin Laden
(1957-03-10)10 Maart 1957
Riaad, Saoedi-Arabië
Sterf 2 Mei 2011 (op 54)
Abbottabad, Pakistan
Eggenoot/-note Najwa Ghanhem
Khadijah Sharif
Khairiah Sabar
Siham Sabar
Amal Ahmed al-Sadah
Kind(ers) 20 tot 26
Religie Islam (Wahhabisme/Salafisme)[1][2][3][4]

Militêre Diens
Lojaliteit Maktab al-Khidamat (1984–1988)
Al-Kaïda (1988–2011)
Jare in diens 1984–2 Mei 2011
Rang Algemene Emir van Al-Kaïda
Oorloë/Veldslae Sowjet-oorlog in Afghanistan

Wêreldwye oorlog teen terrorisme

Verskeie bewyse verbind hom met die terreuraanvalle van 11 September. Bin Laden het byvoorbeeld net vóór 11 September aan kollegas gesê dat hy besig is met 'n groot operasie teen die Verenigde State van Amerika (VSA). Drie van die kapers is vervolgens regstreeks met Bin Laden en al-Kaïda verbind. Een is ook as 'n sleutelfiguur geïdentifiseer in die bomaanvalle op die Amerikaanse ambassades in Nairobi en Dar-es-Salaam in 1998, sowel as die aanval op die Amerikaanse oorlogskip die USS Cole in 2000.

Die mees verdoemende bewyse teen Bin Laden, wat volgens die VSA onteenseglik sy aandeel aan die terreurdade bewys, is egter 'n video-opname wat in die Pentagon se besit is. Die video-opname beeld Bin Laden uit waar hy 'n uiteensetting lewer van sy beplanning van die terreuraanvalle van 11 September.

Lewensgeskiedenis wysig

 
Die Pakistanse joernalis Hamid Mir voer 'n onderhoud met Osama bin Laden, ca. 1997/1998
 
Osama bin Laden saam met Ayman al-Zawahiri tydens 'n onderhoud met die Pakistanse joernalis Hamid Mir op 8 November 2001

Osama bin Laden is in 1957 in Riaad, Saoedi-Arabië, gebore. Sy moeder was van Siriese afkoms en sy vader, Mohammed Awad bin Laden, was Jemenities. Osama was die sewende seun uit vyftig broers en susters. Sy vader het in 1930 na Saoedi-Arabië geëmigreer en het as 'n portier begin werk. Met sy dood, toe Bin Laden dertien jaar oud was, was hy egter die miljardêr-eienaar van een van die grootste konstruksiemaatskappye in Saoedi-Arabië.

Bin Laden het in Djedda grootgeword en sy skoolopleiding daar ontvang. In 1975, op sewentienjarige ouderdom, is hy met 'n Siriese familielid van hom getroud.

Toe die voormalige Sowjetunie vir Afghanistan in 1979 binnegeval het, het Bin Laden dit as sy plig as Moslem beskou om die inval te beveg. Hy het vegters opgelei en ondersteuning aan hulle gebied, en só die Maktab al-Khidamat-groep tot stand gebring, wat bestaan het uit Moslems van oral oor die wêreld. Hulle het die oorlog beskou as Djihad ('n heilige oorlog), 'n Islamitiese kruistog met die doel om van die Russe ontslae te raak.

In 1989 is die Russe uit die Afgaanse gebied gedwing. Bin Laden en sy groeiende Afgaanse weerstandsbeweging het hulle nou daarop toegespits om alle nie-Moslems in die aangrensende gebiede te beveg. Die Amerikaanse magte wat in Afghanistan agtergebly het, tesame met hul Midde-Oosterse bondgenote, het nou Bin Laden en sy groep se vyande geword. Intussen het Bin Laden — kort nadat die oorlog met die Sowjetunie beëindig is — hom weer in Saoedi-Arabië gaan vestig. In 1991 is hy uit Saoedi-Arabië verban weens anti-regeringsbedrywighede. Hy het hom in Soedan gaan vestig, waar hy die volgende vyf jaar woonagtig was. As gevolg van druk wat deur die VSA uitgeoefen is, is Bin Laden in 1996 ook uit Soedan verban. Hy het nou teruggekeer na Afghanistan, waar hy as gas van die Taliban verwelkom is.

Bin Laden het sy familiefortuin gebruik om aanvalle teen die VSA te loods en is deur die Amerikaanse staatsdepartement beskryf as een van die belangrikste borge wêreldwyd van ekstremistiese Islamitiese aktiwiteite. Sy Al-Kaïda-organisasie is 'n sambreelorganisasie van ongeveer twintig Islamitiese groepe, insluitend die Islamitiese Djihad, Hizboellah en die Bewapende Islamitiese Groep, wat takke in verskeie lande het. Die ledetal van Al-Kaïda is onbekend. Ramings wissel vanaf etlike honderde tot 3 000.

Met die aanvang van 2002 het daar steeds onsekerheid bestaan oor waar Bin Laden hom in daardie stadium bevind het. Sommige waarnemers het gespekuleer dat hy steeds in die bergagtige Tora-Bora-gebied in Afghanistan skuil. Andere het geglo dat hy na Pakistan gevlug het, waar hy in 'n aanval deur Amerikaanse magte op 2 Mei 2011 doodgemaak is.

Op 1 Mei (VSA tyd) kondig president Barack Obama aan op die Amerikaanse televisie dat Bin Laden in 'n Amerikaanse operasie in Pakistan doodgemaak is.[6]

Verwysings wysig

  1. (en) Fair, C. Christine; Watson, Sarah J. (18 Februarie 2015). Pakistan's Enduring Challenges. University of Pennsylvania Press. p. 246. ISBN 978-0-8122-4690-2. Osama bin Laden was a hard-core Salafi who openly espoused violence against the United States in order to achieve Salafi goals.
  2. (en) Brown, Amy Benson; Poremski, Karen M. (18 Desember 2014). Roads to Reconciliation: Conflict and Dialogue in the Twenty-first Century. Routledge. p. 81. ISBN 978-1-317-46076-3.
  3. Osama Bin Laden (2007) Suzanne J. Murdico
  4. Armstrong, Karen (11 Julie 2005). "The label of Catholic terror was never used about the IRA". The Guardian (in Engels). Londen. Geargiveer vanaf die oorspronklike op 4 November 2019.
  5. HAT Taal-en-feitegids, Pearson, Desember 2013, ISBN 978-1-77578-243-8
  6. (en) N.Y. Times – Osama bin Laden is killed

Eksterne skakels wysig