Ou Landbougebou UP
Die Ou Landbougebou op die Hatfieldkampus van die Universiteit van Pretoria, wat deur JB Dey van die Departement Openbare Werke in 1917 ontwerp is, is eers in 1921, na die einde van die Eerste Wêreldoorlog, voltooi, en amptelik deur Generaal Jan Smuts geopen. Die gebou het oorspronklik die Fakulteit Landbou gehuisves, maar deesdae huisves dit die Departemente Verbruikerstudies en Voedselwetenskappe. Die gebou se prominente fasade en witgeverfde gewel-ingang toon elemente van die Kaaps-Hollandse boustyl. Op die gewel is daar ’n reliëf van mitologiese figure. Die boligte by die hoofingang is versier met houtkerfwerk. Die boonste verdieping van die gebou is in 1975 deur 'n brand vernietig, maar die gebou is suksesvol tot sy oorspronklike styl en kondisie gerestoureer. [1]
