P.G. Gouws

Piet G. Gouws (?-2003) was ’n Afrikaanse joernalis en skrywer.

Lewe en werk

Piet Gouws begin sy loopbaan in die joernalistiek as korrespondent vir Die Volksblad terwyl hy nog op skool is. Nadat hy in 1958 matrikuleer begin hy werk by die advertensie-afdeling van Die Volksblad. Van 1964 tot 1970 is hy lid van die nagsubkantoor van Die Transvaler, waar Johann Botha, skrywer van “Die groot vyf”, een van sy kollegas is. Hierna maak hy ’n kortstondige draai by Dagbreek en hierdie Sondagkoerant se opvolger, Rapport. In 1971 begin hy saam met twee vennote Vista, gemeenskapskoerant vir die Goudveld en sy mense in die Vrystaat. Teen die einde van 1980 sluit hy by die redaksie van Die Vaderland aan en toe hierdie koerant sluit, gaan hy oor na Die Transvaler. Met die sluiting van hierdie koerant keer hy terug na Vista, waar hy in 2001 aftree. Hy is getroud met Bets en hulle het drie kinders, Andries, Anke en Demps. Hulle woon in Welkom in die Vrystaat, waar hy en sy vrou die eerste huisouers is vir ’n huis van die Goudveldse Jeugsorgsentrum. Hierdie sentrum sorg vir kinders uit die Winburg-kinderhuis wat hier in die gemeenskap terug geplaas is. Kort voor sy dood verhuis hy en sy vrou na Bloemfontein sodat hy nader aan die hospitaal kan wees. Hy is op Saterdag 25 Januarie 2003 in Bloemfontein aan kanker oorlede.

Skryfwerk

Hy bundel sy eksperimentele kortprosa in “Wes van Wes”, wat die novelles “Straat” en “Wes van Wes” bevat. Hierna volg die roman “Die skarlaken affêre”. Dirk Beytel is hierin die skoolhoof en burgemeester op Bitterveld en ’n gesiene man in die samelewing. Hy probeer hard om sy aansien te behou en nie by skandale betrokke te raak nie, maar dinge verander wanneer Alet Ferreira uit die stad terugkom na die dorp. Hy publiseer ook gedigte en kortverhale in Standpunte en Tydskrif vir Letterkunde. Sy kortverhaal “Voertsek” word in die versamelbundel “Drif” onder redaksie van Lindeque de Beer opgeneem.

Eerbewyse

In 2001 word hy vereer met ’n Sanlam-toekenning vir gemeenskapsdiens in erkenning vir die belangrike bydrae wat hy tot die joernalistiek gelewer het.

Publikasies

Jaar	Publikasies
1965	Wes van wes
1993	Die skarlaken affêre

Bronnelys

Tydskrifte en koerante

• Anoniem “P.G. Gouws” “Your library” January-March 2005
• Anoniem “Oudredakteur vir 42 jaar in pers vereer” “Volksblad” 27 September 2001
• De Wet, Tom “Bekende Welkomse joernalis dood” “Volksblad” 27 Januarie 2003

Internet

• De Wet, Tom Volksblad: http://152.111.11.6/argief/berigte/volksblad/2003/01/27/5/23.html
• Esaach: http://www.esaach.org.za/index.php?title=Gouws,_P.G.
• Volksblad: http://152.111.11.6/argief/berigte/volksblad/2001/09/27/36/1.html