Panmiksie beteken lukrake paring.[1][2] ’n Panmiktiese bevolking is een waar alle individue potensiële maats is. Dit veronderstel daar is geen beperkings op paring vir die bevolking nie, nie geneties of wat gedrag betref nie, en dat alle rekombinasies (nageslagte met kombinasies van gene wat nie in die ouers aanwesig is nie)[3] dus moontlik is.

In genetika beteken lukrake paring[4] die paring van individue ongeag enige fisieke, genetiese of sosiale voorkeur. Die paring tussen twee organismes word dus nie beïnvloed deur enige omgewings-, erflikheids- of sosiale interaksie nie. Potensiële maats het ’n ewe groot kans om vir paring gekies te word.

Verduideliking wysig

In eenvoudige terme is panmiksie die moontlikheid dat individue in ’n bevolking sonder beperkings kan paar; individue kan vryelik in hulle habitat rondbeweeg, moontlik oor honderdduisende kilometers, en dus met enige lid van die bevolking paar.

Om die belangrikheid hiervan te verstaan, kan ’n mens jou verskeie begrensde bevolkings van dieselfde spesie voorstel (byvoorbeeld ’n weiende herbivoor) wat deur die een of ander fisiese eienskap van die omgewing geïsoleer word (’n digte woud wat weiding in dele verdeel). Namate die tyd verloop, sal natuurlike seleksie en genetiese verskuiwing elke bevolking mettertyd genetiese differensiasie laat ondergaan, wat elke bevolking geneties uniek sal maak (en eindelik sal kan lei tot spesievorming of plaaslike uitsterwing).

As die skeiding egter verwyder word voordat dit gebeur (deur byvoorbeeld ’n pad deur die woud te bou) en die individue word toegelaat om vryelik rond te bweeg, sal die individuele bevolkings weer kan kruisteel. Mettertyd sal hulle geneties eenvormiger en ’n enkele panmiktiese bevolking word.

Verwysings wysig

  1. King C. en Stanfield W.D. 1997. Dictionary of genetics. Oxford. "Panmixia (panmixis): random mating as contrasted with assortative mating."
  2. Merriam-Webster Medical Dictionary. "Panmixia: Random mating within a breeding population."
  3. "Rekombinasie" in die WAT. Aanlyn by viva-afrikaans.org (intekening nodig). Besoek op 26 September 2020.
  4. Choudhuri, Supratim (9 Mei 2014). Bioinformatics for Beginners: Genes, Genomes, Molecular Evolution, Databases and Analytical Tools. ISBN 9780124105102.

Skakels wysig