Phil Heemstra
Dr. Phillip Clarence Heemstra (9 Desember 1941 - 29 Augustus 2019) was ’n Amerikaans-Suid-Afrikaanse igtioloog. Hy is in Melrose Park, Illinois, VSA, gebore as die seun van Clarence William Heemstra en sy vrou, Lydia (gebore Epcke).[1] Hy het in Ottawa, Illinois, skoolgegaan en het die graad B.Sc. Soölogie in 1963 aan die Universiteit van Illinois in Urbana, Illinois, behaal, asook sy M.Sc.-graad (1968) en doktorsgraad (1974) in mariene biologie aan die Universiteit van Miami in Miami, Florida. Hy het in 1978 in Suid-Afrika kom woon.[1]
Phil Heemstra | |
|---|---|
| Gebore | Phillip Clarence Heemstra 9 Desember 1941 |
| Sterf | 29 Augustus 2019 (op 77) |
| Nasionaliteit | Amerikaans/Suid-Afrikaans |
| Alma mater | Universiteit van Illinois Universiteit van Miami |
| Beroep | Igtioloog |
| Titel | Doktor |
| Eggenoot | Elaine Margaret Heemstra |
| Kinders | Drie |
Heemstra was met sy afsterwe ’n kurator emeritus van die Suid-Afrikaanse Instituut vir Akwatiese Biodiversiteit (SAIAB, voorheen die J.L.B. Smith-instituut vir Igtiologie). Hy het in igtiologie en seevistaksonomie gespesialiseer.
Loopbaan wysig
Heemstra was onder andere ’n bioloog aan die mariene laboratorium van die Amerikaanse departement van natuurlike hulpbronne in Florida en van 1978 tot 2001 kurator van seevisse van die J.L.B. Smith-instituut vir Igtiologie in Grahamstad.
Sy werk het ingesluit navorsing oor sistematiek, biologie (veral voortplanting), soögeografie en die bewaring van seevisse, ’n opname van die visdiversiteit van Suider-Afrika en die westelike Indiese Oseaan, en die identifikasie van seevisse vir instellings in Suid-Afrika en oorsee. Hy was ook ’n konsultant vir talle publikasies en die skrywer of medeskrywer van verskeie boeke, onder andere Coastal Fishes of Southern Africa[2] saam met Elaine Heemstra. Hy het ook baie eerbewyse van verskeie instansies ontvang.
Hy was lid van onder andere die Soölogievereniging van Suider-Afrika, die Igtiologievereniging van Japan, die Amerikaanse Vereniging vir Igtoloë en Herpetoloë en die Vereniging vir Sistematiese Bioloë.
Persoonlike lewe wysig
Heemstra is op 15 Maart 1991 met Elaine Margaret Grant getroud;[1] Elaine het ’n seun, Andrew Grant. Phil en sy eerste vrou, Valerie, het twee dogters, Lydia en Julia.
Verwysings wysig
- ↑ 1,0 1,1 1,2 Phillip Clarence Heemstra op Prabook
- ↑ Coastal Fishes of Southern Africa. Phil & Elaine Heemstra. 2004. ISBN 1-920033-01-7