Pierre Fourie (bokser)
Pierre Jacy Fourie (26 Junie 1943 - 21 Junie 1980) was 'n Suid-Afrikaanse bokser. Hy was 'n onoorwonne middel- en ligswaargewig Suid-Afrikaanse kampioen en het beide titels terselfdertyd gehou. Hy het uit boks getree in 1977. Hy sterf op 21 Junie 1980, 'n paar dae voor sy 37ste verjaarsdag in 'n motorongeluk by die Cecil Paynepark in Roodepoort. Hy is die eerste wit bokser uit Suid-Afrika tydens die apartheid era wat teen 'n nie-blanke opponent, die Amerikaner Bob Foster, geboks het op 21 Augustus 1973 in Suid-Afrika.[2]
| Pierre Fourie | |
| Statistiek | |
|---|---|
| Geboortenaam | Pierre Jacy Fourie |
| Gewigklas | Middel- en Ligswaargewig[1] |
| Lengte | 1.87 m |
| Nasionaliteit | Suid-Afrika |
| Geboorte | 23 Junie 1943 Johannesburg |
| Sterfte | 21 Junie 1980 Roodepoort |
| Boksrekord | |
| Totale gevegte | 60 |
| Oorwinnings | 52 |
| Oorwinnings met uitklophou | 10 |
| Verloor | 7 |
| Gelykop | 1 |
Loopbaan
wysigFourie was afgerig deur Allan Toweel nadat hy professioneel begin boks het op 2 Mei 1966. Hy wen sy eerste geveg met 'n uitklophou in die eerste ronde. Die vennootskap tussen Fourie en Toweel, een van die mees suksesvolste in die geskiedenis van Suid-Afrikaanse boks, het vir elf jaar gestrek tot en met Fourie se uitrede uit boks. In sy loopbaan van 60 professionele gevegte het Fourie hom onderskei as 'n harde, skoon en wetenskaplike bokser eerder as 'n ruwe vegter.
Hy klop Johnny Wood twee keer en Willie Ludick om sy Suid-Afrikaanse middelgewig titels te hou en was onoorwonne. Daarna boks hy ook as 'n ligswaargewig. Hy verdedig sy ligswaartitel tweekeer teen Sarel Aucamp suksesvol en was ook hier onoorwonne. Hy veg twee keer teen Bob Foster vir die World Boxing Council en World Boxing Association titels en verloor elke keer met punte. Hy het ook twee keer teen Victor Galíndez geveg vir die World Boxing Association-titel wat hy ook op punte verloor. Die laaste beslissing was omstrede omrede baie mense geglo dat Fourie gewen het. Ironies het Galindez ook in 'n motorongeluk gesterf, vier maande na Fourie.
Hy het 52 oorwinnings behaal en was met punte geklop deur Foster op 21 Augustus 1973 in Albuquerque, VSA, op 1 Desember 1973 in die Randse Stadium en deur Galindez op 5 April 1975 in die Standard Bank Arena in Johannesburg en op 13 September 1975 in die Randse Stadium.
Die tweede geveg tussen Fourie en Foster was die eerste geveg in Suid-Afrika tussen 'n swart en 'n wit bokser en was 'n deurbraak om diskriminasie in professionele boks asook ander sport te verwyder. Daar was 37,4704 toeskouers by die geveg, die hek inkomste was ongeveer R 500,000 en die wengeld vir Foster was 'n gewaarborgde $ 200,000. Beide die bedrae was wêreldrekords vir hulle tyd vir die ligswaar divisie.
Fourie veg sy laaste geveg in Maart 1977 teen Gerrie Coetzee vir die Suid-Afrikaanse swaargewig titel, wat hy verloor.
Verwysings
wysig- ↑ https://boxrec.com/en/proboxer/278
- ↑ Jackson, Ron (2 Julie 2006). "The origins of boxing in SA". SuperSport.com (in Engels). MultiChoice. Geargiveer vanaf die oorspronklike op 11 Mei 2018. Besoek op 20 Mei 2012.