Prins Christian Victor van Sleeswyk-Holstein
Prins Christian Victor van Sleeswyk-Holstein (Albert Ludwig Ernst Anton; 14 April 1867 – 29 Oktober 1900) was ’n lid van die Britse koningshuis wat in Suid-Afrika aan maagkoors gesterf het. Hy was die oudste seun van Helena, prinses Christiaan van Sleeswyk-Holstein, die derde dogter van Koningin Victoria, en prins Christian van Sleeswyk-Holstein.[1]
| Prins Christian Victor | |
|---|---|
| Prins Christian Victor van Sleeswyk-Holstein | |
 | |
| Volle naam | Christian Victor Albert Ludwig Ernst Anton |
| Loopbaan | Britse Weermagoffisier |
| Huis | Oldenburg |
| Vader | prins Christiaan van Sleeswyk-Holstein |
| Moeder | Helena, prinses Christiaan van Sleeswyk-Holstein |
| Gebore | 14 April 1867; Windsor-kasteel, Berkshire |
| Oorlede | 29 Oktober 1900; Pretoria, Suid-Afrika |
Prins Christian is op 14 April 1867 in Windsor-kasteel gebore. Hy het skoolgegaan aan Wellington-kollege, Magdalen-kollege, Oxford, en die Koninklike Militêre Akademie Sandhurst. Hy was in dié opsig die eerste lid van die koninklike familie wat nie tuis onderrig is nie. Op Wellington het hy voetbal gespeel en hy was kaptein van die krieketspan by Wellington- en Magdalen-kollege en Sandhurst. In 1887 het hy selfs ’n wedstryd op professionele vlak gespeel.
Ná sy studies aan Sandhurst is hy in 1888 aangestel in die regiment “60th King's Royal Rifles” en later in “4th King’s Royal Rifle Corps”. Vervolgens het hy in verskillende gebiede gedien. Hy het in 1898 onder lord Kitchener gedien toe die Britse troepe deur die Dervishe by Omdoerman naby Khartoem in Soedan verslaan is. Hy het deelgeneem aan die Ashanti-ekspedisie na Ghana. In 1900 is hy na Suid-Afrika gestuur om in die Anglo-Boereoorlog te veg waar hy onder lord Roberts gedien het. Hier het hy malaria opgedoen en is op 29 Oktober op 33-jarige ouderdom aan maagkoors dood. Hy is op 1 November in Pretoria begrawe.
Prins Christiaan Victor is tydens sy lewe geëer as “Ridder Grootkruis van Bad” (GCB) en “Ridder Grootkruis in die Koninklike Victoriaanse Orde” (GCVO). ’n Metaalkruis is ter ere van hom in die Sint Alban Anglikaanse Katedraal in Pretoria aangebring.
Verwysings
wysig- ↑ Eilers, Marlene A., Queen Victoria's Descendants, 1987, Genealogical Publishing Company, p. 205.
Eksterne skakels
wysig
Wikimedia Commons het meer media in die kategorie Prins Christian Victor van Sleeswyk-Holstein.
