Proletkult
Proletkult is 'n Russiese afkorting van пролетарская культура (proletarskaja kultura - proletariese kultuur). Die term verwys na 'n kultuur-rewolusionêre beweging van die Russiese Oktoberrewolusie wat as 'n federasie van plaaslike kultuurverenigings en avantgarde-kunstenaars gevestig is en sy invloed veral in die visuele, literêre en die dramatiese kunste laat geld het.
Met die destydse Petrograd as sy bakermat, het hierdie beweging tussen 1917 en 1925 pogings onderneem om 'n kultuur van die nuwe heersende proletariese klas te skep wat geensins meer aan burgerlike invloede blootgestel sou wees nie. Proletkult het hom vir die radikale verandering van bestaande kunsvorme en die skepping van 'n nuwe rewolusionêre werkersklas-estetiek beywer wat sy inspirasie in die bou van 'n nuwe industriële samelewing in 'n voorheen agterlike en agrariese Rusland gevind het.
In kennisteoretiese opsig het aanhangers van Proletkult 'n radikale standpunt-teorie ingeneem. Hul hoofteoretikus was Aleksander A. Bogdanof (1873-1923), naas ander beduidende verteenwoordigers soos Anatoli W. Loenatsjarski (1875-1933), Aleksei Gastef, Fjodor Kalinin en Michail Gerassimof. Ten opsigte van die beeldende kunste was aanvanklik die konstruktivisme rigtingwysend, terwyl musiek en literatuur veral deur die Futurisme beïnvloed is.
Eksterne skakels
wysig- Eietydse literatuur
- Proletkult in Oostenryk
- Oekraïense Internet-ensiklopedie
- (en) Proletkult