Richmond Hill, Londen

Richmond Hill is 'n heuwel in die London Borough of Richmond, 'n distrik in die suidweste van die Britse hoofstad, met 'n effense helling aan sy noordekant van die Teemsriviervallei se weivelde af. Dit was hier waar koning Hendrik VII van Engeland vroeg in die 16de eeu die Richmond-paleis as koninklike woning laat oprig het, terwyl Karel I 'n deel van die terrein as sy privaat jaggebied (tans Richmond Park) verklaar het.

Die uitsig oor die Teems vanaf Richmond Hill. Die heuwel was een van Turner se gunstelingplekke - met die uitsig oor die Teems as 'n wederkerende motief in die kunstenaar se olie- en waterverfskilderye, potloodsketse en kunsdrukke

Arkadië langs die Teems: J.M.W. Turner se Richmond Hill, on the Prince Regent's Birthday
Olie op doek. Tate Britain, Londen

Die uitsig oor die Teems vanaf Terrace Walk, Richmond Hill tydens 'n hewige donderbui

Die uitsig vanaf Richmond Hill oor die Teems, wat deur Sir Walter Scott as 'n ongeëwenaarde landskap van natuurskoon beskryf is, is onsterflik gemaak in 'n wye reeks van gedigte en skilderye, waaronder J.M.W. Turner se befaamde View of the Thames from Richmond Hill en The Thames from Richmond Hill, en in lofliedere besing. Dit is ook die enigste uitsig in Engeland wat deur 'n parlementswet – die Richmond, Ham en Petersham Open Spaces Act van 1902 – as natuurmonument beskerm is. Tot vandag is dit die mees landelike van alle uitsigte op Londen se kimlyn, met plesierbote en grasende koeie op rustige weilande.

Die natuurskoon van die gebied en die nabyheid van 'n koninklike paleis het reeds in die 16de eeu adellikes en welvarendes gelok wat hier hul statige wonings laat bou het en die aanleiding gegee tot die stigting van Richmond, 'n nedersetting wat oorspronklik in die graafskap Surrey geleë was en in 1890 by Londen ingesluit is. Oor die eeue heen het Londenaars hier ambisieuse eiendomsprojekte verwesenlik, terwyl adellikes hul eie weergawe van Arkadië teen die voet van die heuwel herskep het. Temidde van tuine, parke, bosse en weivelde het paleise ontstaan wat deur 'n netwerk van lane met mekaar verbind is. Die heuwel en sy omgewing het in 2006 omvattende restourasie ondergaan waartydens die oorspronklike flora met wildeblomme en inheemse bome herstel is.

Eksterne skakels

• Wikimedia Commons het meer media in die kategorie Richmond Hill, Londen.