Riemland

Die Riemland is ’n streek in die ooste van die Vrystaat wat rofweg omgrens word deur die nasionale paaie bekend as die N1, N3 en N5. Kroonstad, Bethlehem, Lindley, Reitz, Heilbron en Senekal is die grootste dorpe in die gebied.

Cornelia is 'n dorpie in die Riemland

Liggings van dorpe van die Riemland

In die 1800’s was die grasvlaktes bekend as goeie jagveld weens die volop en ryk verskeidenheid aan wild. So baie velle is tot riempies en swepe verwerk, dat die streek die bynaam Riemland ontvang het. Voortrekkers het hulle in die gebied kom vestig en met die Matebeles onder Silkaats in botsing gekom. Gedurende Oktober 1836 vind die geveg by Vegkop, 25km suid van die huidige Heilbron, plaas. By Heilbron en Lindley is begraafplase wat die Tweede Vryheidsoorlog in herinnering roep.

Gemengde boerdery (met die klem op graan) is 'n kenmerk van die streek. Ekotoerisme wen veld en wildsplase met die wild wat oorspronklik daar voorgekom het, word ontwikkel.

In Heilbron is die Riemland Museum en Elandskop Museum in Petrus Steyn. Net suidwes van Petrus Steyn is die spoorweghalte Riemland. Die twee dorpe kan as die kern van die streek beskou word.

Sien ook

• Lys van streeksname in Suid-Afrika

Verwysings

• Meintjes, Chris: Rambling down the Riemland route. Country Life, Februarie 2011, pp.50-55
• Standard Encyclopaedia of Southern Africa, deel 9. Kaapstad: Nasou, 1973. ISBN 0-625-00325-X