Rooihek-administrasiegebou
Die Rooihek-administrasiegebou is een van die neoklassieke geboue in Moskou bekend as die Sewe Susters van Josef Stalin wat in die vroeë 1950's gebou is. Dit is deur Aleksei Doesjkin ontwerp[1] en in 1953 voltooi. Sy naam kom van Rooihekplein, waarop dit staan.
Beskrywing
wysigDie hooftoring het 24 vlakke en is 133 m hoog. Dit bevat onder meer twee woonstelkomplekse van 11 verdiepings wat deur dieselfde argitek ontwerp is. Die komplekse bevat sowat 300 woonstelle elk.
Die bou van die wolkekrabber is bemoeilik deur die nabygeleë Moskouse Metro-tonnels en die Krasnije Worota-treinstasie. Doesjkin het ’n tweede ingang na die stasie op die grondverdieping van die wolkekrabber gebou; dit is op 31 Julie 1954 geopen.
Nadat dit die hoofkwartier van die departement van swaarnywerheidsbouwerk was, het die administratiewe deel van die gebou ook die departement van vervoerbouwerk gehuisves. Dit is ook bekend as die Lermontof-toring, genoem na die skrywer Michail Lermontof en Lermontofskajaplein, soos Rooihekplein tussen 1962 en 1986 geheet het.
Verwysings
wysig- ↑ Frommer's Moscow Day by Day, Hillary Gilbert; John Wiley & Sons, 2008
Eksterne skakels
wysig
Wikimedia Commons het meer media in die kategorie Rooihek-administrasiegebou.
Hierdie artikel is vertaal uit die Engelse Wikipedia
