Russkaja Germanija
Russkaja Germanija (Russies Русская Германия, Russiese Duitsland) is 'n onafhanklike Russiese weekblad wat in Duitsland en Europa versprei word. Dit word elke Woensdag in Duitsland met 'n verkoopte sirkulasie van 54 252 eksemplare (soos in die vierde kwartaal van 2014) uitgegee en is op straat asook in winkels, wat op Russiese klante gemik is, te koop. Daarnaas is subskripsies en - sedert 1999 - ook 'n gratis aanlyn-weergawe beskikbaar.
Geskiedenis
wysigDie eerste uitgawe het as Russkij Berlin (Русский Берлин) op 17 Junie 1996 in Berlyn verskyn en is uitsluitlik in die Duitse hoofstad versprei. Die weekblad het destyds oor politiek, ekonomie, sport en maatskaplike onderwerpe berig. Daarnaas is ook literêre werke gepubliseer. Russkij Berlin het homself as raadgewer en wegwyser vir immigrante uit die voormalige Sowjetunie beskou.
Sedert 1997 is RB as nasionale weekblad vir die hele Duitsland versprei, terwyl die naam na Russkaja Germanija gewysig is. Russkij Berlin het as streeksuitgawe vir die hoofstad voortbestaan. In 2000 is 'n tweede streeksuitgawe vir Noordryn-Wesfale, Rheinskaja Gazeta, op die mark ingevoer. Russkaja Germanija - Frankija, nóg 'n streeksuitgawe vir Franke, is vir die eerste keer in 2002 uitgegee en later as Russkaja Germanija - Bawarija in die hele deelstaat Beiere versprei. 'n Streeksuitgawe vir Hamburg, Russkaja Germanija - Gamburg, word eweneens sedert 2002 uitgegee.
'n Aantal projekte is saam met twee Russiese nuusblaaie, Argumenty i Fakty en Kommersant, verwesenlik.