Safa en Marwa

Safa en Marwa (Arabies: الصفا Aṣ-Ṣafā, المروة al-Marwah) is twee klein heuwels wat nou in die Al-Masdjid al-Haram in Mekka, Saoedi-Arabië, geleë is. Moslems loop sewe keer heen en weer tussen die heuwels tydens die bedevaarte hadj en oemra.

Safa in die Al-Masdjid al-Haram, Mekka.

Geskiedenis

In die Islamitiese tradisie het Allah vir Abraham opdrag gegee om sy vrou Hagar en hul seun Ismael alleen in die woestyn te los, tussen Safa en Marwa. Toe hul voorraad opraak, het Hagar gaan water soek. Om makliker en vinniger te loop het sy Ismael alleen agtergelaat.

Sy het eerste die naaste heuwel, Safa, uitgeklim om oor die omringende gebied uit te kyk. Toe sy niks sien nie, het sy na die ander heuwel, Marwa, gegaan. Wanneer Hagar op een van die heuwels was, kon sy Ismael sien en het sy geweet hy is veilig. Op die vlakte tussen die heuwels kon sy hom egter nie sien nie en het sy gehardloop. Sy het sewe keer heen en weer in die hitte gehardloop voordat sy na haar seun teruggekeer het. Daar het sy ’n fontein gesien wat ontspring het waar die aartsengel Gabriël die grond met sy vlerk aangeraak het. Dié fontein is bekend as die Zamzam-put, en het gedien as ’n bron van water vir Hagar en ’n beloning vir haar geduld.

Ligging

Al-Masdjid al-Haram huisves die Kaäba, die fokuspunt van gebed vir alle Moslems. Safa – van waar die rituele staptog, die saj, begin – is sowat 100 m van die Kaäba af geleë en Marwa sowat 350 m. Die afstand tussen die heuwels is sowat 450 m, en dus is die hele staptog sewe keer heen en weer sowat 3,15 km ver. Die twee heuwels en die pad tussenin is nou onderdak en vorm deel van die moskee.

Die saj (سعى saʿy, "soektog") is in herinnering aan Hagar se soeke na water en God se genade om gebede te verhoor.

Galery

• 
  Die saj in die rigting van Safa.
• 
  Middelste deel vir ouer en gestremde mense.
• 
  Die saj terug van Safa af.

In die Koran

Safa en Marwa word ook in die Koran genoem.

Voorwaar, Safã en Marwa is van die tekens van Allah; daarom sal hy wat ’n bedevaart na die Huis onderneem, of ’n besoek daar gaan aflê, sonder blaam wees as hy rondom albei van hulle gaan. En wie vrywillig goeie dade doen – laat hy weet: Allah is Erkentlik, Alwetend.

– Hoofstuk 2:158

In die Westerse kultuur

Safa is na bewering die berg waarna verwys word in die algemene spreekwoord "As die berg nie na Mohammed wil kom nie, moet Mohammed na die berg toe gaan". Dit was nadat Mohammed die berg volgens ’n oorlewering beveel het om na hom te kom en die berg onbeweeglik bly staan het. Die spreekwoord word dikwels verkeerdom aangehaal.