Saint Hill Manor
Saint Hill Manor is 'n Engelse country house (herehuis) in Saint Hill Green naby East Ginstead, 'n nedersetting in die graafskap Wes-Sussex. Die herehuis is in 1792 vir Gibbs Crawfurd (1732–1793) uit sandsteen gebou en was vervolgens in besit van verskeie bekende persoonlikhede voordat dit in 1959 deur die Amerikaanse wetenskapsfiksie-skrywer en stigter van die Kerk van Sciëntologie, L. Ron Hubbard, van sy laaste eienaar, die Maharadja van Jaipur, gekoop is om sewe jaar lank as die Hubbard-gesin se privaat woning en vervolgens ook as die kerk se Britse hoofkwartier te dien.[1] Tot 1967 was dit ook die wêreldhoofkwartier. Die Kerk is vervolgens agt jaar lank vanuit 'n skip bestuur wat ook as privaat woning van L. Ron Hubbard en sy gesin gedien het, die Apollo.
