Sentrale mark van Riga
| Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Die Sentrale mark van Riga (Lets: Rīgas Centrāltirgus) in die Letlandse hoofstad is die grootste voedselmark en onderdak-basaar in Europa.
Toe die markgebou, wat vanaf 1922 beplan en tussen 1924 en 1930 gebou is, op 2 November 1930 ingewy is, was dit die modernste van sy soort. Die mark met sy kenmerkende Neoklassisistiese en Art Déco-stylelemente word as een van die merkwaardigste voorbeelde van 20ste eeuse argitektuur in Letland beskou en is deur UNESCO in 1997 saam met die historiese middestad van Riga as wêrelderfenis gelys.
Vir die dakkonstruksie van die mark se vyf pawiljoene of hoofgeboue met 'n hoogte van 35 meter is dele van 'n Duitse lugskip-hangar in Vaiṇode, Koerland gebruik wat ná die Eerste Wêreldoorlog deur Letland oorgeneem is. Riga se sentrale mark het 'n gebou-oppervlakte van 72 300 m² en huisves meer as 3 000 verkoopstalletjies wat tussen 1 en 100 m² beslaan.[1] Die mark lok daagliks tussen 80 000 en 100 000 besoekers.
Die sentrale mark het in 1995 'n aandelemaatskappy in besit van die munisipaliteit Riga geword.