Shiji

Shiji (Historiese Rekords), ook bekend as Taishigong shu (Aantekeninge van die Groot Historikus), is die eerste Chinese werk wat die hele Chinese geskiedenis beskryf. Die boek het 'n buitengewone invloed op Chinese letterkunde in die algemeen en Chinese geskiedskrywing in die besonder gehad. Die werk is deur Sima Tan begin en is ná sy dood deur sy seun Sima Qian voltooi. Die werk is sy magnum opus. Die datum van voltooiing is onbekend, maar is na 99 vC. Shiji begin met die Geel Keiser (Huangdi), die eerste van die mitiese Vyf Antieke Keisers, en gaan voort tot in die bewind van keiser Han Wudi (r. 140-87 vC) van die Han-dinastie en tydgenoot van Sima Qian. Die hele werk strek oor 130 juan en het volgens Sima Qian 526 500 karakters bevat. Die boek het as model gedien vir alle latere amptelike dinastiese geskiedenisse en word dus as die eerste werk in daardie reeks beskou.

Die titelblad van die 1982-uitgawe deur die Zhonghua boek maatskappy, foto deur huowax