Simba

Simba is die leeupersonage en hoofkarakter uit een van Disney se bekendste tekenprent-rolprent trilogie, Die Leeukoning (Engels: The Lion King). Hy is die seun van Mufasa en Sarabi, broerskind van Scar, lewensmaat van Nala en vader van Kiara. Sy naam beteken "leeu" in Swahili. Hy beskik oor 'n goue pels en, sodra hy volwassenheid bereik, het hy rooi maanhare.

Simba
Marionet van Simba as 'n welpie
Skepping
Eerste verskyning	The Lion King (1994)
Geskep deur	Irene Mecchi Jonathan Roberts Linda Woolverton
Stem	Matthew Broderick (volwasse, in 3 rolprente) Jonathan Taylor Thomas (welpie) Joseph Williams (sang, volwasse) Jason Weaver (sang, welpie) Matt Weinberg (welpie in The Lion King 1½) Cam Clarke (verskeie opvolgprente en goedere) Rob Lowe (The Lion Guard)
Inligting
Spesie	Leeu
Geslag	Manlik
Getroud met	Nala
Kinders	Kiara (dogter) Kion (seun)
Ander familie	Mufasa (vader, oorlede) Sarabi (moeder) Scar (oom, oorlede)

Voorstellers van Simba

Media (in die oorspronklike Engelse benaming)	Akteur
The Lion King (1994) (rolprent)	Jonathan Taylor Thomas (welpie stem) Matthew Broderick (volwasse stem) Jason Weaver (singende welpie stem) Joseph Williams (singende volwasse stem)
Timon and Pumbaa (1995) (televisie-reeks)	Cam Clarke (volwasse stem)
The Lion King (1997) (Broadway musiekblyspel)	Scott Irby-Ranniar (welpie) (oorspronklike akteur) Jason Raize (volwassene) (oorspronklike akteur)
The Lion King II: Simba's Pride (1998) (rolprent)	Matthew Broderick (volwasse stem) Cam Clarke (singende volwasse stem)
The Lion King 1½ (2004) (rolprent)	Matt Weinberg (welpie stem) Matthew Broderick (jeugdige en volwasse stem)

Die Leeukoning (The Lion King)

By die aanvang van Die Leeukoning word Simba as die pasgebore seun van Koning Mufasa en Koningin Sarabi aan die kykers vertoon. Hy word deur die wyse mandril, Rafiki, gesalf en omhoog bo-op die Leeurots gehou, sodat al die diere van Leeuland hul toekomstige koning kan aanskou.

Soos Simba groter word, verander hy in 'n lewendige, weerbarstige en soms selfs 'n verwaande jong welpie, wat glo dat koningskap beteken dat hy van soggens tot saans kan hiet en gebied soos hy luskry. Deur die welpie se naïewe geaardheid tot sy voordeel aan te wend, vertel sy konkelende oom Scar hom van die Olifantbegraafplaas. Hoewel hy vir Simba aanraai om nie soontoe te gaan nie, weet hy verseker dat die jong welpie uit pure nuuskierigheid juis daar 'n draai sal wil gaan maak. Nie net kies Simba self koers daarheen nie, maar neem ook sy beste maat, Nala, saam met hom. Simba en Nala beraam 'n plan om van Zazu, hul neushoringvoël oppasser, ontslae te raak, wat regdeur 'n musiekblyspel uitgevoer word.

Sodra hulle die begraafplaas bereik, word hulle deur drie gevlekte hiënas, Shenzi, Banzai en Ed, wie eintlik Scar se dienaars is, aangekeer. Mufasa snel die twee welpe te hulp nadat hy deur Zazu van hul verknorsing ingelig is. Mufasa is baie teleurgesteld in Simba, maar besluit daarteen om hom te bestraf. In plaas daarvan leer hy hom van al die groot konings uit die verlede wat bo by die sterre geleë is, wat altyd 'n ogie oor die jong prins hou.

Die volgende dag laat Scar Simba alleen in 'n v-vallei agterbly, deur hom wys te maak dat sy vader 'n ‘reuse verrassing’ het wat oppad is, en dat hy daarvoor moet wag. Scar beveel dan vir Shenzi, Banzai en Ed om 'n wildebeesstormloop op die been te bring. Mufasa red Simba uit die stormloop, maar toe hy homself probeer red, word die koning deur sy broer tussen die wildebeeste ingegooi, en vertrap.

Weereens word Simba deur sy oom 'n gat in die kop gepraat, dié keer om te glo dat hy vir sy eie pa se dood verantwoordelik is en daarvoor landuit moet vlug. Emosioneel verpletter en te weerloos om nugter oor die saak dink, kies die hoofkarakter die hasepad. Om doodseker te maak dat Simba nooit as opvolger van die troon sal dien nie, stuur Scar sy hiënas agterna om hom te vermoor. Simba ontsnap 'n strook doringbosse in en hardloop die woestyn in. Die hiënas, afgeskrik deur die doringbosse, reken dat dit onnodig is om Simba verder agterna te sit, siende dat die kanse goed lyk dat hy in die woestyn sal omkom.

Simba val weens hitteuitputting bewusteloos in die woestyn neer. Aasvoëls kolk en vergader rondom Simba, maar word deur Timon en Pumbaa ('n meerkat en vlakvark onderskeidelik) verjaag. Hulle beveilig en neem hom na hul oerwoudtuiste. Waar hulle aanklank vind by die gedagte van 'n roofdier wat hulle eendag kan beskerm, stel hulle Simba aan 'n insekte-dieet voor, wat hy glad nie te versmaai vind nie. Simba bereik wasdom terwyl hy in die oerwoud woonagtig is. Hy leef tussen drie tot vyf jaar volgens die Hakuna Matata (‘Geen Bekommernisse, Geen Probleme!’)-leuse, hoewel hy sy pakkie innige selfbeskuldiging steeds met hom saamdra.

Die ommekeer ontstaan toe Nala, wat 'n gewelddadige jong leeuin geword het, in sy lewe weer opdaag. Die ou vriendskapsband tussen Simba en Nala vorder tot 'n liefdesverhouding. Sy vertel hom van Scar se verwoestende dwingelandy wat oor Leeuland woed en probeer Simba oorreed om terug te keer as die regmatige koning. Simba weier om hulp aan haar te verleen of om enige rede vir sy besluit te verstrek.Hy hardloop die grasveld in om hul rusie te beëindig, met Nala wat ontsteld en verward agterbly.

Terwyl Simba alleen is, verskyn Rafiki en vra Simba om hom te volg, omrede hy weet waar om die blykbaar ‘lewendige’ Mufasa op te spoor. Die leeu volg Rafiki deur die grasveld en doringbosse tot by 'n poel water. Hier sê Rafiki vir hom om na sy weerkaatsing te kyk; hy kyk in die gesig van sy pa s’n vas. Mufasa se spook verskyn in 'n warrelende stormwolk, wat vir sy seun aanpraat om na sy vaderland terug te keer en sy geregtelike plek as koning in die lewensiklus te neem. Simba besef wat hom te doen staan en hardloop deur die woestyn terug Leeuland toe. Nala, Timon en Pumbaa haal hom op 'n hoë rots in wat oor die gehawende landskap uitkyk.

Timon en Pumbaa lok 'n paar hiënas weg, wat Simba die kans gun om na Scar te sluip. Hy konfronteer sy oom, wie op sy beurt Simba oortuig om valslik te beken dat hy vir Mufasa se dood aanspreeklik gehou moet word, en probeer Simba, met die hulp van sy hiëna-weermag, om die lewe te bring. Ewenwel, soos Simba aan die rand van Leeurots se voorgebergte vasklou, fluister Scar, wat onder die indruk is dat hy gewen het, aan Simba die waarheid omtrent Mufasa se dood. 'n Verwoede Simba vlieg op en druk Scar se strottehoof teen die grond vas en dwing hom hierdeur om die waarheid aan die nabye leeuinne te bieg. 'n Geveg volg terwyl Leeurots in ligte laaie is, wat veroorsaak is toe 'n weerligstraal 'n dooie boom getref het. Nala versamel al die ander leeuwyfies, wat haar ma Sarafina en die gewese Koningin Sarabi insluit, en val die hiënas aan.

Simba wen die stryd deur Scar oor 'n krans te gooi. Laasgenoemde word deur die hiënas doodgemaak, sienend dat hy vroeër in 'n teenoormekaarstelling met Simba hulle as die ware vyand beskou het, in 'n poging om homself te verontskuldig. Simba neem uiteindelik sy regmatige plek op Leeurots in, en brul onder gietende reën oor sy koninkryk uit.

'n Onbepaalde tydperk later, wanneer Leeuland weer tot sy volle prag herstel is, vergader die diere weereens om Leeurots, waar Rafiki vir Simba en Nala se pasgebore welpie hoog oplig, om sodoende die lewensiklus te laat voortgaan.

Die Leeukoning II: Simba se Trop (The Lion King II: Simba’s Pride)

In hierdie rolprent het Simba 'n dogter, genaamd Kiara. Op 'n dag gee Simba toe dat Kiara op haar eie mag speel, maar stel Timon en Pumbaa aan om haar te bewaak. Timon en Pumbaa raak in 'n stryery oor goggas betrokke, en Kiara benut die kans om ongesiens weg te glip. Sy loop oor na die verbode Uitland, waar sy Kovu ontmoet – hy is 'n Uitlander-welpie wie se trop weens hul trouheid aan Scar uit Leeuland verban is. Die twee welpies speel aan-aan totdat Simba tussenbeide tree om Kovu se ma, Zira, wie vir Kiara en Kovu die heeltyd onderlangs dopgehou het, te konfronteer. Ná die partye uit mekaar loop, praat Simba alleen met Kiara en verduidelik aan haar dat hy en sy “een is”.

As volwassene vra sy haar vader of sy op eie houtjie haar eerste jagtog kan deurvoer. Simba bly egter bekommerd oor haar en stuur Timon en Pumbaa agterna om haar op te pas, ten spyte van Nala se maning om hul dogter haar sin te gee. Toe Kiara agterkom dat Timon en Pumbaa op haar spioeneer, hardloop sy weg, net om vasgekeer te word deur 'n veldbrand wat deur die Uitlanders (Nuka en Vitani, (half)broer en suster van Kovu) gestig is. Kiara raak doodsangsbevange, stik weens rookinaseming en val flou neer. Kovu red haar lewe. Aanvanklik wou Simba vir Kovu wegstuur, maar Nala bearbei hom om Kovu as deel van die Leeulandtrop te aanvaar.

Dieselfde aand nog kry Simba 'n nagmerrie: hy probeer sy vader, Mufasa, van sy dood te red, maar word verhinder deur Scar, wat tot Kovu vervorm. Simba is onbewus daarvan dat Kovu deur Zira opgelei is om sy trop in te sypel, om hom sodoende op die geskikte tyd te vermoor. Simba begin geleidelik vir Kovu vertrou, terwyl Kiara en Kovu smoorverlief op mekaar raak. Kort voor lank weet Kovu nie meer of sy lojaliteit by Leeuland of Uitland lê nie.

Na 'n paar dae, nooi Simba Kovu saam met hom vir 'n wandel; Scar se ware verhaal word aan Kovu oorvertel. Zira en die Uitlanders omsingel vir Kovu en Simba tydens hul staptog, wat onmiddellik Simba se wantroue in Kovu laat herontvlam. Kovu probeer aan Simba verduidelik dat hy geensins iets met die aanval te make het nie en probeer selfs Simba beskerm, maar word deur Vitani platgeslaan. Simba word beseer en klim teen 'n damwal van boomstompe op, wat veroorsaak dat 'n paar houtstompe loswikkel en op Nuka afrol. Kovu word van Nuka se dood beskuldig en moet in skaamte na Leeuland toe vlug.

Simba, wat nou besef dat Kovu duistere bybedoelings gehad het toe hy Kiara gered het, verban die leeu en weier om sy verskonings aan te hoor. Kiara is hierdeur verbysterd, sê vir Simba dat hy nooit Mufasa sal wees nie en gaan soek vir Kovu. Die liefdespaartjie verenig in die woestyn later daardie nag.

Op die oomblik wanneer Simba die grot binnekom en uitvind dat sy dogter soek is, bring Zazu die noodberig dat die Uitlanders oorlog verklaar het. Simba, die leeuinne, Timon en Pumbaa maak vir die geveg gereed. Na die langdurige veldslag sê Simba en Zira vir mekaar reguit, en finaal, die stryd aan. Kiara en Kovu tree tussenbeide en beëindig die oorlog, deur beide partye te oorreed dat hulle “een is”. Zira verwerp die stelling. Noudat die Uitlanders sien wie en wat Zira werklik is, begeef hulle haar geheel en al en sluit by Simba se trop aan. 'n Heftige Zira probeer Simba bespring, maar word deur Kiara gedwarsboom. Die twee leeuwyfies tol 'n digby kloof binne, wat weens die gebreekte boomstompdam gevul is met malende vloedwater. Ten spyte van Kiara se bystandverlening, bly Zira hardkoppig, gly en val na benede in die vol rivier. Na Simba en Kiara weer veilig by die ander is, erken Simba die fout wat hy begaan het en aanvaar vir Kovu en die Uitlanders as deel van sy trop. Die twee verenigde trop leeus keer terug na Leeurots, waar Kiara en Kovu in die eg tree. Ter viering hiervan, stap Kovu, Kiara, Simba en Nala die voorgebergte op en brul oor die koninkryk uit.

Die Leeukoning 1½ (The Lion King 1½)

Hierdie rolprent brei meer uit oor Simba se ongesiene lewe in die oerwoud saam met Timon en Pumbaa, ná sy verbanning uit Leeuland. Simba blyk verskriklik woelig te wees – hy beklouter hoë en gewaagde bome en swem oor watervalle, ongeërg oor die gevaar waarin hy verkeer of Timon se wanhopige pogings om hom te tugtig. As halfvolwassene het hy Timon in elke liewe kewervreetwedstryd uitgestof, soos die slakslurpwedstryd wat in die rolprent getoon word. In een toneel word dit aan die lig gebring dat hy gereeld nagmerries kry, wat moontlik oor Mufasa se dood handel.

Ander mediavoorstellings

Simba se verhaal is in 'n wye reeks kinderletterkunde opgeneem en uitgebrei, vernaamlik Die Leeukoning: Ses Nuwe Avonture-reeks (The Lion King: Six New Adventures), waar hy 'n seun, genaamd Kopa, het.

Simba verskyn af en toe kortliks in die Timon & Pumbaa televisietekenprent-reeks. Onder andere is daar een episode waar Timon hom herroep om Pumbaa se geheue te probeer verfris, omrede die vlakvark aan geheueverlies ly. In Congo On Like This vermoed Timon en Pumbaa dat Simba na sy vleisetende aard teruggekeer het; hulle word ook in Shake Your Djibouti gedwing om Simba op te lei om hulle teen 'n laboratoriumgedrog te beskerm en in Rome Alone word Simba deur Romeine gevange geneem en gedwing om in 'n swaardvegterstrydperk met 'n ander leeu, Claudius, te baklei. Simba is ook teenwoordig in die musiekvideo van The Lion Sleeps Tonight saam met Timon en Pumbaa.

Familie

• Mufasa (vader)
• Sarabi (moeder)
• Sarafina (skoonmoeder)
• Ahadi (grootvader)
• Uru (grootmoeder)
• Nala (lewensmaat)
• Kopa (seun)
• Kiara (dogter)
• Kovu (skoonseun)
• Scar (oom)
• Nuka (moontlike neef)
• Vitani (moontlike nig)
• Timon en Pumbaa (beskermers/vriende)

Bronne

• Bio op imdb.com Geargiveer 1 Maart 2011 op Wayback Machine