Sina en die paling
Sina en die paling (Samoaans: Sina ma le Tuna) is ’n verhaal in die mitologie van Samoa wat verduidelik waar die eerste kokospalms vandaan kom.[1][2]
Die mite is ook in ander dele van Polinesië bekend, insluitende Tonga en Fidji en onder die Maori van Nieu-Seeland.[3] Verskillende weergawes word in verskillende dele van die lande van Oseanië vertel.[4] Dit word ook verbind met ander godinne in die Polinesiese mitologie, soos Hina, Tinilau, Tagaloa en Nafanua.
Die mite
wysigVolgens een weergawe van die verhaal het ’n pragtige meisie met die naam Sina op die eiland Savai'i in Samoa gewoon. Sy het ’n troetelpaling gehad en toe dit grootword, het dit op haar verlief geraak. Dit het die meisie bang gemaak en sy het probeer weghardloop, maar die paling het haar gevolg. Sy het eindelik op ’n dorp gaan wegkruip.
Toe sy na die dorp se poel gaan om water te gaan haal, het sy die paling uit die water na haar sien opkyk. Kwaad het sy uitgeroep: E pupula mai, ou mata o le alelo! ("Jy staar na my, met die oë van ’n duiwel!") Mans van die dorp het gekom en die paling doodgemaak. Terwyl dit doodgegaan het, het dit Sina gevra om sy kop in die grond te begrawe. Sina het dit gedoen en ’n kokospalm het op dié plek gegroei. Wanneer die hulsel van die kokosneut verwyder word, is daar drie ronde merke wat lyk soos die gesig van ’n vis met twee oë en ’n mond. ’n Gat word in een van die merke gemaak om die klappermelk te drink – wanneer Sina dit drink, soen sy dus die paling.
Die poel Mata o le Alelo op die dorpie Matavai word verbind met die mite van Sina en die paling.[5] Dit is genoem na Sina se woorde in die verhaal. Die poel is oop vir die publiek.
Ander weergawes
wysig- In ’n ander weergawe van die mite is Sina van die dorpie Laloata op die eiland Upolu, en haar pa se naam is Pai.[6]
- Op die eiland Mangaia in die Cookeilande gaan die verhaal oor ’n beeldskone vrou met die naam ‘Ina-moe-Aitu wat in ’n grot naby die dorp Tamarua woon en in ’n stroom in haar grot bad.[7]
Verwysings
wysig- ↑ "Living Heritage". Geargiveer vanaf die oorspronklike op 29 Oktober 2012. Besoek op 7 Augustus 2016.
{{cite web}}: CS1 maint: bot: original URL status unknown (link) - ↑ O le Tala ia Sina ma lana Tuna (Sina and the Eel)
- ↑ Craig, Robert D. (2004). Handbook of Polynesian Mythology. ABC-CLIO. p. 88. ISBN 978-1-57607-894-5.
- ↑ Clark, Kate McCosh (2008). Maori Tales and Legends. Read Books. p. 68. ISBN 978-1-4437-5874-1.
- ↑ Mageo, Jeannette Marie (2001). Cultural Memory Reconfiguring History and Identity in the Postcolonial Pacific. University of Hawaii Press. p. 72. ISBN 978-0-8248-2386-3.
- ↑ Turner, George (2007). Samoa a Hundred Years Ago and Long Before. BiblioBazaar. p. 185. ISBN 978-1-4346-2473-4.
- ↑ "'Ina and Tuna". Geargiveer vanaf die oorspronklike op 15 September 2013. Besoek op 7 Augustus 2016.
{{cite web}}: CS1 maint: bot: original URL status unknown (link)
Eksterne skakels
wysig- Die legende in Samoaans
- Die legende op die webtuiste van die National Park of American Samoa
Hierdie artikel is vertaal uit die Engelse Wikipedia
