Tonga

Tonga (Engels: [ˈtɒŋə] of [ˈtɒŋɡə]; Tongaans: [ˈtoŋa]), amptelik die Koninkryk Tonga (Engels: Kingdom of Tonga; Tongaans: Puleʻanga Fakatuʻi ʻo Tonga), is 'n eilandstaat in die Stille Oseaan en Oseanië wat uit 169 eilande bestaan, waarvan 36 bewoon is. Tonga beslaan 'n oppervlakte van 748 km² en het 'n bevolking van 100 209 in 2021 gehad.

Koninkryk Tonga
Kingdom of Tonga (Engels)
Puleʻanga Fakatuʻi ʻo Tonga (Tongaans)

Vlag Wapen
Nasionale leuse: Ko e ʻOtua mo Tonga ko hoku tofiʻa (Tongaans vir: "God en Tonga is my erfenis")
Volkslied: Ko e fasi 'o e tu'i 'o e 'Otu Tonga (Tongaans vir: "Die lied van die koning van die Tonga-eilande")
Hoofstad	Nukuʻalofa 21°8′S 175°12′W
Grootste stad	Nukuʻalofa
Amptelike tale	Tongaans en Engels
Regering • Monarg • Eerste minister	Unitêre parlementêre grondwetlike monargie Tupou VI Siaosi Sovaleni
Onafhanklikheid • Huidige grondwet • van die Verenigde Koninkryk	4 November 1875 4 Junie 1970
Oppervlakte  - Totaal    - Water (%)	748 km2  (175ste) 289 myl2 4,0
Bevolking  - 2021-sensus  - Digtheid	100 209 139 / km2 (76ste) 360 / myl2
BBP (KKP)  - Totaal  - Per capita	2021-skatting $637 miljoen $6 361
BBP (nominaal)  - Totaal  - Per capita	2021-skatting $501 miljoen $5 010
MOI (2019)	0,725 (104de)  –  hoog
Gini (2015)	37,6 –  medium
Geldeenheid	Paʻanga (TOP)
Tydsone  - Somertyd	(UTC+13) (UTC+14)
Internet-TLD	.to
Skakelkode	+676

Ligging van Tonga

Kaart van Tonga

Tonga is in die ooste van Fidji, in die suidooste van Wallis en Futuna, in die suide van Samoa, in die suidooste van Amerikaans-Samoa, in die weste van Niue en die Cookeilande en in die noorde van Nieu-Seeland geleë. Die hoofstad en grootste stad is Nukuʻalofa.

Die Nederlandse ontdekkingsreisiger Willem Schouten het Tonga in 1616 as eerste Europeër bereik, gevolg deur Abel Tasman in 1643. In 1773, 1774 en 1777 het die Britse ontdekkingsreisiger James Cook Tonga besoek. In 1845 het die ambisieuse jong vegter, strateeg en woordvoerder Tāufa'āhau Tonga as 'n koninkryk verenig en in 1875 tot 'n grondwetlike monargie verklaar. Tonga het 'n beskermde staat geword, nadat die koninkryk op 18 Mei 1900 met die Verenigde Koninkryk 'n Verdrag van Vriendskap onderteken het. Onder die beskerming van Groot-Brittanje kon Tonga as enigste Pasifiese land sy soewereiniteit en monargiese regering behou (in teenstelling met Hawaii en Tahiti). Die Verdrag van Vriendskap en Tonga se beskermingsstatus het in 1970 volgens gevestigde reëlings, wat in 1965 deur Koningin Sālote Tupou III ingestel is, geëindig. Tonga is 'n unitêre parlementêre grondwetlike monargie binne die Britse Statebond met 'n eie monarg as staatshoof. Tonga is een van slegs vyf lande binne die Britse Statebond, waar 'n inheemse monarg op die troon sit (die ander vier is Broenei, Eswatini, Lesotho en Maleisië).

Sport

Sewesrugbywedstryd tussen Uganda en Tonga, 2006

Tonga voer die sipi tau voor die wedstryd teen Frankryk tydens die Rugbywêreldbeker 2011 op

Rugby is verreweg die gewildste sportsoort in dié land en Tonga is een van die min lande waar rugby die hoofsport is. Slegs die Cookeilande, Fidji, Nieu-Seeland, Samoa en Wallis kan soortgelyke bewerings maak. Die Tongaanse nasionale rugbyspan het sedert 1987 vir byna elke rugbywêreldbekertoernooi (behalwe vir dié van 1991) gekwalifiseer en behoort tot die 12 top-rugbyspanne wêreldwyd. Hulle is veral bekend vir die tradisionele sipi tau-oorlogsdans voor elke wedstryd.

Soos in ander Pasifiese eilandstate word op Tonga 'n tradisionele plaaslike soort krieket beoefen, lanita genoem.

Bronnelys

Algemeen

• (en) "Tonga". Encyclopædia Britannica. Besoek op 31 Desember 2021.
• (en) "Tonga". Central Intelligence Agency. Besoek op 31 Desember 2021.

Eksterne skakels

• Wikimedia Commons het meer media in die kategorie Tonga.
• (en) Toerisme-inligting oor Tonga op Wikivoyage
• (en) Amptelike webwerf van die Tongaanse regering