Skone

Skone (Sweeds en Deens Skåne, Latyn Scania) is 'n historiese provinsie in die suide van Swede wat tot in die 17de eeu deel uitgemaak het van die Koninkryk Denemarke. Dit kom grootliks ooreen met die huidige provinsie Skåne län en gebied van die provinsiale munisipaliteit (wat ook 'n vroeëre selfstandige munisipaliteit in die historiese provinsie Halland insluit).

Velde met bloeiende raapsaad is 'n tipiese landskapstoneel in Skone. Vrugbare leemgrond het van die gebied die belangrikste graanstreek in Skandinawië gemaak.

Vlag van Skone

Wapen van Skone

Die belangrikste stedelike sentra is Malmö (die provinsiale hoofstad), Helsingborg, Kristianstad, Landskrona, Lund, Trelleborg en Ystad. Skone maak saam met die Deense eilande Seeland, Bornholm, Lolland, Falster en Møn deel uit van die transnasionale Öresundstreek.

Vanweë die nabyheid aan Denemarke is in die plaaslike Sweeds nog steeds 'n Deense aksent in die naam. Sowel Denemarke en Swede het eeue lank aanspraak op Skone, Halland en Blekinge gemaak, en eers in 1658 is hierdie gebiede by Swede ingelyf.

Danksy sy vrugbare grond, gematigde klimaat en ryk visterreine speel Skone steeds 'n beduidende rol as die belangrikste landboustreek van Swede. Die plaaslike landskap word deur saggies golwende heuwellande en groen weivelde in die kusgebiede gekenmerk, waarby Österlen in die suidooste 'n gewilde trekpleister vir toeriste en kunstenaars geword het. Die binneland word deur die heuwelreekse Söderåsen, Romeleåsen en Linderödsåsen en klein mere oorheers, waarvan Ringsjö en Krankesjö as voëlparadyse bekend staan.

Vervoer

'n Pågatåg in die Kävlinge-stasie

Ligging van Skone in Swede

In die 1950's is in Skone met die bou van snelweë begin – die gedeelte tussen Malmö en Lund was selfs die eerste snelweg in Swede en vorm tans die beginpunt van die Europese roete E 22. Kort daarna is 'n snelwegnetwerk volgens die Duitse voorbeeld gebou. Skone was in hierdie opsig rigtingaangewend aangesien die res van die land nog in die 1960's slegs oor kort snelweë beskik het wat nie met mekaar verbind was nie. Skone se netwerk het uit die internasionale veerboothawens geloop, en intussen maak die Öresundbrug ook deel uit van hierdie netwerk.

Skone beskik daarnaas oor 'n eersterangse spoorwegnetwerk. Op die lyn tussen Malmö en Stockholm ry moderne X 2000-hoëspoedtreine, terwyl die treindienste Pågatåg en Öresundståg belangrike nedersettings in Skone met mekaar verbind. Met die voltooiing van die Öresundbrug is die treinskedules in Skone by dié van die Deense eiland Seeland aangepas.