Skatpligtige is ’n term vir ’n voormoderne staat wat in ’n spesifieke onderdanige verhouding met ’n magtiger staat was en die stuur van ’n gereelde soort belasting, of skatpligtigheid, aan die hoër mag ingesluit het.[1] Dié belasting was dikwels in die vorm van goud of slawe, en kan dus as ’n soort beskermingsgeld beskou word. Dit kon ook meer simbolies gewees het: Soms het dit ’n teken van onderdanigheid behels, soos die bunga mas (goue blomme) wat heesers op die Maleise Skiereiland aan die konings van Siam gestuur het, of die bywoning van geleenthede aan die hof van die heerserstaat as ’n openbare teken van onderdanigheid.

’n Bunga mas, ’n vorm van skatpligtigheid wat die koning van Siam se vasalstate op die Maleise Skiereiland vir hom gestuur het.

’n Stelsel van skatpligtigheid het in Oos-Asië ontstaan met baie naburige Oos-, Sentraal-, Suidoos- en Suid-Asiatiese lande en streke wat skatpligtiges van verskeie keiserlike Chinese dinastieë geword het.[2][3] Histories het die keiser van China homself beskou as die keiser van die hele beskaafde wêreld. Dit was dus nie vir hom moontlik om gelykwaardige diplomatieke betrekkinge met enige ander mag te hê nie, en die Chinese het alle diplomatieke betrekkinge in die streek as ’n vorm van skatpligtigheid beskou. Enigiets wat China ontvang het, selfs deur handel, is as skatpligtigheid beskou en alles wat ander state van China ontvang het, is beskou as geskenke wat die keiser uit goedhartigheid aan dié state gegee het.

In die Filippyne het die heersers van die administratiewe streke tot in 1898 vasale van die Spaanse Ryk geword, en hulle reg om te regeer is deur koning Filips II van Spanje erken op voorwaarde dat hulle heffings aan die Spaanse kroon betaal.

Moderne vorme van skatpligtiges is vasal- en satellietstate.

VerwysingsWysig

  1. [1] Asiatic, Tributary, or Absolutist International Socialism, November 2004
  2. http://www.lse.ac.uk/economicHistory/Research/GEHN/GEHNPDF/GEHNWP21-GA.pdf
  3. Garver, John W. (Julie 2011). Protracted Contest: Sino-Indian Rivalry in the Twentieth Century. ISBN 9780295801209.

SkakelsWysig