Sneeubalaarde
Sneeubalaarde is ’n hipotese dat die aarde se oppervlak een of meer kere heeltemal of feitlik heeltemal met ys bedek was, meer as 650 miljoen jaar gelede. Dit is ’n onderwerp van debatvoering in die wetenskapwêreld.
Hipotese
wysigVoorstanders van die hipotese meen dit is die beste verduideliking daarvoor dat afsettings wat gewoonlik met gletsers verbind word, op al die kontinente aangetref word, selfs in gebiede wat volgens paleogeografiese getuienis in dié tyd naby die ewenaar geleë was.
Teenstanders bevraagteken die implikasies van die getuienis en die geofisiese haalbaarheid van ’n oseaan wat met ys of half gesmelte ys bedek is.[1][2] Hulle lê klem op hoe moeilik dit vir die aarde sou wees om uit so ’n toestand te ontsnap. Daar is steeds ’n paar onbeantwoorde vrae, soos of die aarde heeltemal met ys bedek was en of daar ’n dun strook om die ewenaar was waar oop (of seisoenale oop) water voorgekom het.
Die sneeubalaarde-episodes het vermoedelik plaasgevind voor die skielike "ontploffing" van veelsellige organismes tydens die Kambrium. Die mees onlangse episode kon ’n sneller gewees het vir die evolusie van meerselligheid. ’n Ander, veel vroeër en langer episode, die Paleoproterosoïese verysing wat 2,4 tot 2,1 miljard jaar gelede sou plaasgevind het, kon veroorsaak gewees het deur die eerste verskyning van suurstof in die atmosfeer, bekend as die Groot Suurstofkatastrofe.
Verwysings
wysig- ↑ Kirschvink, J. L. (1992). "Late Proterozoic low-latitude global glaciation: The snowball Earth". In Schopf, J. W.; Klein, C. (reds.). The Proterozoic Biosphere: A Multidisciplinary Study (PDF). Cambridge University Press. pp. 51–2.
- ↑ Allen, Philip A.; Etienne, James L. (2008). "Sedimentary challenge to Snowball Earth". Nature Geoscience. 1 (12): 817–825. Bibcode:2008NatGe...1..817A. doi:10.1038/ngeo355.
Eksterne skakels
wysig
Hierdie artikel is vertaal uit die Engelse Wikipedia
