Soetendalsvlei
Die Soetendalsvlei in die Strandveld by Bredasdorp is die grootste en mees suidelike natuurlike varswatermeer in Suid-Afrika.
Stroomgebied
wysigDie Nuwejaarsrivier loop van noordwes verby Elim in die Soetendalsvlei. Op sy beurt neem die Heuningnesrivier die vlei se water na sy mond in die De Mond-natuurreservaat.
Die Strandveld lê 'n 30 tot 45m bo seevlak. In hierdie kusgebied is die Soetendalsvlei verreweg die grootste van 'n aantal vlak mere. Veral Voëlvlei, 'n paar kilometer na die noordweste, is die tuiste van verskeie soorte watervoëls. Ander panne in die vleilandgebied is Varkvlei, Soutpan, Waskraalvlei, Langpan, Brakpan, Melkbospan, Vispan en Zeekoeivlei. Dus is die hele gebied gewild onder voëlkykers.
Plaas
wysigDie plaas Soetendalsvlei het 'n plaashuis wat dateer uit ongeveer 1816. Bekende Overbergse boere soos Reitz, Van Reenen, Van Breda, Joubert, Swart, Lourens en Albertyn het die eerste merinoskape in Suid-Afrika hier geteel. Dit is dus die geboorteplek van die Suid-Afrikaanse wolbedryf. Ook word daar met perde en koring geboer. In die vroegste tye is daar al in die riviere en mere visgevang. Ook die groot sandsteenblokke waarmee die Kaap Agulhasvuurtoring gebou is, kom van hier.
Naam
wysigDie vlei ontleen sy naam aan die VOC-skip Zoetendaal wat oos van Kaap Agulhas gestrand het.
Bibliografie
wysig- Burrows, Edmund H.: Overberg Odyssey. People, roads and early days. Swellendam: Swellendam Trust, 1994. ISBN 0-620-18780-8
- Burrows, Edmund H.: Overberg Outspan. A chronicle of people and places in the south western districts of the Cape. Kaapstad: Swellendam Trust, 1988. ISBN 0-620-12930-1
- Kaart: Slingsby's Overberg whale coast. Muizenberg: Slingsby Maps, April 2010. 5de uitgawe.
- Standard Encyclopaedia of Southern Africa, deel 10. Kaapstad: Nasou, 1974. ISBN 0-625-00326-8.