Sopwith Snipe

Die Sopwith Snipe is 'n enkelsitplek, dubbeldekker Britse vegvliegtuig wat laat tydens die Eerste Wêreldoorlog diens gedoen het. Die vliegtuig was ontwerp om die bekende Sopwith Camel te vervang. Die vliegtuig was ontwerp met 'n nuwe 230 perdekrag Bentley-enjin. Dit kon hoër vlieg en was vinniger as sy voorganger. Dit was in 1918 beskou as die beste Geallieerde vegvliegtuig op die westelike front en geprys deur die vlieëniers vir sy spoed, krag en beweeglikheid. Die uitsig vanuit die kajuit was ook beter as dié van die Camel wat veral belangrik is tydens nagvlugte. Daar was net minder as 500 Snipes gebou in 1918 en daar was eindelik 1,567 eenhede afgelewer aan die Britse Lugmag. Dit het oor moderne eienskappe beskik soos 'n elektries verhitte kajuit en suurstof vir die vlieënier. Alhoewel die vliegtuig eers die front slegs agt weke voor die einde van die oorlog bereik het, was dit genoeg tyd om te bewys dat die Snipe die Duitse vliegtuie oorskadu het.

Sopwith Snipe
William George Barker se Snipe
Tipe	Vegvliegtuig
Vervaardiger	Sopwith Aviation Company
Ontwerp deur	Herbert Smith
Nooiensvlug	September 1917
Onttrek	1927
Hoofgebruiker	Britse Lugmag
Aantal gebou	1 567
Weergawes	Sopwith Salamander

Op 27 Oktober 1918 het Majoor William Barker in Snipe van 201 Eskader hom vasgeloop teen 60 Fokker D.VII's waarvan 15 hom aangeval het. Hy het hulle vuur beantwoord, vier afgeskiet en twee ander beskadig voordat hy 'n noodlanding moes doen weens bloed verlies en sy vliegtuig vol koeëlgate was. Die Victoriakruis was aan hom toegeken vir dié daad.

Tot en met 1923 was die vliegtuig Brittanje se enigste verdediging en het in diens gebly tot 1927.

Tegniese besonderhede

Besonderhede van die Sopwith Snipe:

Item	Statistiek
Aantal motors	1
Tipe motor	Skroef
Vervaardiger	Bentley B.R.2 suierenjin
Kraglewering per motor	230 perdekrag
Vlerkspan	9,17 m
Lengte	6,02 m
Hoogte	2,67 m
Vlerkoppervlakte	25,08 m2
Maksimum opstygmassa	916 kg
Maksimum snelheid	195 km/h
Operasionele hoogte	5 945 m
Uithouvermoë	3.0 uur
Klimvermoë	460 m per minuut
Bewapening	Twee gesinchroniseerde 7,7 mm masjiengewere.

Sien ook

• Lys van vegvliegtuie

Bron

• Crosby, Francis: THE WORLD ENCYCLOPEDIA OF FIGHTERS & BOMBERS. 2015. ISBN 978-1-84476-917-9