Habsburg (kasteel)

Die Habsburg-kasteel was oorspronklik 'n dubbele woonkasteel wat deur die grawe van Habsburg naby die gelyknamige nedersetting in die Switserse kanton Aargau op die bergpiek Wülpelsberg teen 'n hoogte van 505 m bo seevlak opgerig is. Die kasteel het bekendheid verwerf as die stamkasteel van die Huis van Habsburg, een van die magtigste adellike dinastieë in die Europese geskiedenis, wat sy magsfeer aanvanklik met die verwerwing van gebiede in die kasteel se onmiddellike omgewing begin uitbrei het.