Litjieskaktus: Verskil tussen weergawes

'''Litjieskaktus''' (''Opuntia aurantiaca'') is ‘n gevaarlike en skadelike vetplant wat reeds groot dele van die [[Oos-Kaap]] ingeneem het. Dit het ontwikkel tot een van [[Suid-Afrika]] se ernstigste onkruide.

Litjieskaktus is afkomstig uit [[Suid-Amerika]] waar dit inheems is in [[Argentinië]], [[Paraguay]] en [[Uruguay]]. In Suid-Afrika en [[Australië]] is dit 'n [[onkruid]]. Alhoewel die meeste indringerplante per ongeluk in ‘n land ingevoer is, is litjieskaktus en ook [[hakea]], [[lantana]] en die waterhiasint (Eichhornia crassipes) as tuinplante na Suid-Afrika gebring. Een plant is rondom 1860 in ‘n rotstuin in die destydse distrik Stockenström van die [[Kaapkolonie]] geplant.

Litjieskaktus vleg tussen die gras en ander weidingplante in en vorm soms so ‘n digte vervuiling dat dit vir die beeste, skape en bokke moeilik is om die gras by te kom. So verminder dit die drakrag van die veld. Die plant is goed bestand teen droogte en moeilik om uit te roei. By die geringste aanraking breek ‘n lit af en klou dan dikwels aan die dier vas. So besmet dit die [[wol]] en [[sybokhaar]]. Ook beseer dit die pote en bekke van die vee. Die diere loop dan mank en vreet moeilik.