Nieu-Taipei

Nieu-Taipei, soms ook Xinbei genoem, amptelike Engelse naam: New Taipei City (Sjinees: 新北市, Pinyin: Xīnběi Shì, Pe̍h-ōe-jī: Sin-pak-chhī) is die mees bevolkte stad van die Republiek van Sjina op die eiland Taiwan met sowat 3,9 miljoen inwoners. Nieu-Taipei het in Desember 2010 met die samesmelting van alle 29 stede en munisipaliteite in die voormalige landelike Taipei-distrik ontstaan en word regstreeks deur die nasionale regering bestuur.

Sy stadsgebied behels 'n aansienlike deel van Taiwan se noordelike kuslyn en omsluit die Taipei-bekken en die hoofstad Taipei. Dit word in die noord-ooste deur Keelung, die Yilan-distrik in die suid-ooste en die Taoyuan-distrik in die suid-weste begrens.