Zeus-standbeeld van Olimpia
Die Zeus-standbeeld van Olimpia was ’n standbeeld van ’n reusagtige, sittende figuur van sowat 13 meter hoog[1] wat omstreeks 435 v.C. deur die Griekse beeldhouer Phidias gemaak is. Dit het in die Tempel van Zeus in die heiligdom Olimpia in Griekeland gestaan en het bestaan uit ivoor, goud en hout. Dit het die god Zeus voorgestel wat op ’n versierde sederhouttroon sit. Dit is beskou as een van die Sewe Wonders van die Antieke Wêreld totdat dit eindelik omstreeks die 5de eeu n.C. verwoes is.[2]
Geen namaaksel van die beeld is ooit gevind nie en besonderhede oor die voorkoms daarvan is slegs bekend danksy antieke Griekse beskrywings en voorstellings op muntstukke.[3]
Beskrywing wysig
Die groot standbeeld deur Phidias het die helfte van die gang van die tempel wat daarvoor gebou is, beslaan. Die geograaf Strabo het in die 1ste eeu v.C. gesê: "Dit lyk of Zeus die tempel se dak sal afstamp as hy sou opstaan."[4]
Die standbeeld het bestaan uit ivoor- en goudpanele oor ’n houtraamwerk. Die reisiger uit die 2de eeu Pausanias het ’n gedetailleerde beskrywing gegee. Die standbeeld het ’n kroon opgehad wat van olyftakke gemaak was. Dit het goue sandale gehad en ’n goue kleed met ’n patroon van diere en lelies. In die regterhand was ’n beeldjie van Nike, die godin van oorwinning. In die linkerhand was ’n septer met ’n arend bo-op. Die troon was versier met ebbehout, ivoor, goud en edelstene.[5]
Volgens legende is Phidias gevra wat hom geïnspireer het – of hy Berg Olimpus geklim het om Zeus te sien en of Zeus van die berg af gekom het sodat Phidias hom kon sien. Phidias het toe geantwoord sy inspirasie kom uit Homeros se Ilias (Boek 1, verse 528–530).[6]
Verwoesting wysig
Volgens die Romeinse historikus Suetonius het kesier Caligula opdrag gegee dat alle standbeelde van gode met ’n groot heilige of kunstige waarde, insluitende die een van Zeus in Olimpia, na Griekeland gebring word sodat hul koppe verwyder en met afbeeldings van sy eie kop vervang kon word.[7] Voordat dit kon gebeur, is die keiser egter in 41 n.C. vermoor.
Die omstandighede van die standbeeld se vernietiging is onbekend. Volgens een historikus is dit na Konstantinopel geskuif, waar dit in 475 in ’n brand verwoes is. Of dit het in 425 saam met die tempel afgebrand.[8] Ander meen dit is vroeër verwoes, in die 2de eeu.[9]
Verwysings wysig
- ↑ Phidias from encyclopædiabritannica.com. URL besoek op 3 September 2014
- ↑ Statue of Zeus from encyclopædiabritannica.com. URL besoek op 22 November 2006
- ↑ Richter, Gisela M.A., "The Pheidian Zeus at Olympia" Hesperia 35 .2 (April–Junie 1966:166-170) ble. 166f, 170
- ↑ Alaa K. Ashmawy. The Seven Wonders: The Statue of Zeus at Olympia]." URL besoek op 2 Desember 2001.
- ↑ Pausanias, Description of Greece 5.11.1-.10). Aan Pausanias is vertel die skilderwerk op die troon was deur Phidias se broer, Panaenus.
- ↑ Zamarovský, Vojtěch. Za sedmi divy světa. p. 186.
- ↑ Suetonius, Gaius 22.2; vgl. Cassius Dio, 59.28.3.
- ↑ Richter, 1966, nota 1, aanhaling van Georgius Kedrenos, Historiarum Compendium §322c, in Corpus Scriptorum Historiae Byzantinae 34, vol. I, bl. 564.
- ↑ Lucian se dialoog Timon die Misantroop, vertaal deur H.W. Fowler en F.G. Fowler.
Eksterne skakels wysig
- Colin Delaney, "A Wonder to Behold: The Statue of Olympian Zeus" Geargiveer 4 Mei 2006 op Wayback Machine
- Archaeopaedia: Standbeeld van Zeus Geargiveer 5 Februarie 2007 op Wayback Machine met ’n bibliografie
- Michael Lahanas, "The colossal Zeus statue of Pheidias" Geargiveer 3 April 2013 op Wayback Machine
- History.com: "The Seven Wonders"
Wikimedia Commons het meer media in die kategorie Zeus-standbeeld van Olimpia.
Hierdie artikel is vertaal uit die Engelse Wikipedia
Koördinate: 37°38′16.3″N 21°37′48″O / 37.637861°N 21.63000°O