Spesiale Olimpiade
Die Spesiale Olimpiade is 'n internasionale organisasie wat persone met verstandelike beperkinge help om hulle selfvertroue, sosiale vaardighede en fisiese kondisie te verbeter. Hulle organiseer ook die Spesiale Olimpiese Wêreldspele elke vier jaar. Die Spele vind die jaar voor die "normale" Olimpiese Spele plaas.
Die eed wat die atlete voor die wedstryde aflê is: "Let me win. But if I cannot win, let me be brave in the attempt" (Laat my wen. Maar as ek nie kan nie, laat my braaf probeer). Die leuse van die Spesiale Olimpiade is: meedoening is belangriker as die oorwinning.
Geskiedenis
wysigDie Spesiale Olimpiade is in 1968 in Chicago deur Anne McGlone Burke en Eunice Kennedy Shriver gestig.
Die eerste Spesiale Somerspele vind in 1968 in Chicago, Verenigde State plaas. In 1977 vind die eerste Spesiale Winterspele plaas.
In 1988 word die Spesiale Olimpiade amptelik deur die Internasionale Olimpiese Komitee (IOK) erken. Dit is die enige sportorganisasie wat tot hede toestemming van die IOK verkry het om die titel Olimpies te mag gebruik.
Die eerste keer dat die Spesiale Somerspele buite die Verenigde State gehou was, was in 2003, toe die Spele in Dublin, Ierland vanaf 20 Junie tot 29 Junie plaasgevind het. Die tema van hierdie Spele was "Share the Feeling" (deel die gevoel). Dublin ontvang 166 internasionale delegasies, meer as 7000 atlete, 3000 afrigters en 28 000 familielede en vriende.
Die laaste Spesiale Somerspele het vanaf 2 Oktober tot en met 11 Oktober 2007 in Sjanghai, Volksrepubliek China plaasgevind. Byna 7300 atlete uit 165 lande het in 25 verskillende sportdissiplines deelgeneem. Die laaste Spesiale Winterspele was in Nagano (Japan) vanaf 26 Februarie tot 5 Maart 2005 gehou. Tydens dié Spele neem 2600 atlete uit 84 lande deel.