Stefan Kuryłowicz

Stefan Marian Kuryłowicz (* 26 Maart 1949 in Warskou; † 6 Junie 2011 in Asturië, Spanje) was een van die mees toonaangewende argitekte in post-kommunistiese Pole.

Stefan Kuryłowicz
Gebore	Stefan Marian Kuryłowicz 26 Maart 1949 Warskou, Pole
Sterf	6 Junie 2011 (op 62) Asturië, Spanje
Nasionaliteit	Pole
Beroep	argitek
Eggenoot	Ewa Kuryłowicz
Kinders	2 seuns

Stefan Kuryłowicz: Centrum Królewska-kantoorgebou in Warskou

Stadion Miejski in Białystok

Kuryłowicz, wat as dosent by die Warskouse Universiteit van Tegnologie werksaam was, het veral bekendheid met sy moderne sakegeboue van staal en glas verwerf wat die stadshorison van Warskou ná dekades van monotone kommunistiese argitektuur ingrypend verander het. In die vroeë 21ste eeu het hy ook 'n aantal woonstelblokke ontwerp.

Kuryŀowicz het in 1972 sy graad in argitektuur aan die Warskouse Universiteit van Tegnologie behaal. In 1983 het hy sy eie ateljee gestig en in die 1990's en vroeë 21ste eeu een van Pole se invloedrykste argitekte geword. Hy was 'n lid van die Raad vir Argitektuur en Ontwikkeling wat advies aan die burgemeesteres van Warskou, Hanna Gronkiewicz-Waltz, gelewer het.

Kuryłowicz is op 6 Junie 2011 saam met drie ander Poolse burgers in 'n vliegtuigongeluk in Asturië dood. Hy is oorleef deur sy vrou en twee seuns.

Eksterne skakels

• apaka.com.pl